काठमाडौं । श्रीमतीको हत्या गरी फरार भएका व्यक्तिलाई प्रहरीले दुबईबाट पक्राउ गरेको छ । दुबईमा सेक्युरिटी गार्डको काम गर्दै आएका तेह्रथुम आठराई गाउँपालिका–४ तीनसल्लेका ३९ वर्षीय काजीमान पुरीलाई प्रहरीले दुबई पुगेर पक्राउ गरेको हो ।

पुरीलाई पक्राउ गर्नका लागि इन्टरपोलबाट रेड नोटिस जारी गरिएको थियो । पुरीलाई अन्तर्राष्ट्रियस्तरमा खोजतलास गर्नको लागि नेपाल प्रहरीको नेसनल सेन्ट्रल ब्यूरो काठमाडौंको अनुरोधमा इन्टरपोल महासचिवालयबाट रेड नोटिस जारी गरेको थियो ।

श्रीमतीको हत्या गरी दुबई गएर सेक्युरिटी गार्डको काम गर्दै आएका पुरीको खोजी गर्ने क्रममा इन्टरपोल आबुधाबी युएईको समन्वय लिइएको प्रहरी प्रधान कार्यालयले जनाएको छ । उनले २०७६ सालमा आफ्नै श्रीमतीको हत्या गरी दुबई भागेका थिए । हत्यामा संलग्न अन्य दुईजना उनकै भाइहरु पुर्पक्षको लागि कारागार चलान भइसकेका छन् ।

प्रहरी प्रधान कार्यालय इन्टरपोल शाखाबाट प्रहरी नायब उपरीक्षक निशान्त श्रीवास्तवको नेतृत्वमा चैत २८ गते गएको टोलीले प्रहरी टोलीले दुबईबाट पुरीलाई पक्राउ गरी आज मंगलबार नेपाल ल्याएको हो । प्रहरी प्रधान कार्यालयमा राखिएका पुरीलाई आवश्यक कारबाहीका लागि जिल्ला प्रहरी कार्यालय तेह्रथुम पठाइने इन्टरपोल शाखाले जानकारी दिको छ ।