काठमाडौं । वायू प्रदूषण निकै बढेपछि सरकारले देशभरका शैक्षिक संस्थाहरु ४ दिनका लागि भोलिदेखि बन्द गर्ने निर्णय गरेको छ । शिक्षा, विज्ञान तथा प्रविधि मन्त्रालयले बालबालिकाको स्वास्थ्यमा गम्भीर असर परेको भन्दै भोलि मंगलबारदेखि शुक्रबारसम्म देशभरका सम्पूर्ण शिक्षण संस्था बन्द गर्ने निर्णय गरेको हो ।

शिक्षा, विज्ञान तथा प्रविधिमन्त्री कृष्णगोपाल श्रेष्ठको अध्यक्षतामा बसेको आकस्मिक बैठकले मौसम प्रतिकुलताको कारण भन्दै सम्पूर्ण शिक्षण संस्था बन्द गर्ने निर्णय गरेको हो । मन्त्री श्रेष्ठले यो निर्णय गर्नु अघि प्रधानमन्त्री खड्गप्रसाद ओलीसँग परामर्श गरेका थिए ।

लामो समयको खडेरीले हावा सुख्खा भएको र हावाले पानी पार्ने बादलको साटो धुलो र धुँवा हुँदा यसले बालबालिकाको स्वास्थ्यमा असर पुग्ने भन्दै सरकारले शिक्षण संस्था बन्द गर्ने निर्णय गरेको हो । यतिबेला डढेलोको घटना निकै बढेका कारण वायु प्रदूषित भईरहेको छ ।