काठमाडौं । नेकपा माओवादी केन्द्रले गृहमन्त्री रामबहादुर थापा ‘बादल’सहितका मन्त्रीहरुलाई मन्त्रिपरिषद्बाट फिर्ता हुन निर्देशन दिएको छ । माओवादी केन्द्रको हिजो बसेको स्थायी कमिटीको बैठकले नेपाल कम्युनिष्ट पार्टी (एमाले)ले केन्द्रीय कमिटीमा मनोनित गरेका माओवादी केन्द्रका नेताहरुलाई पार्टी परित्याग गरेको हो कि होइन भन्ने विषयमा २४ घण्टाभित्र जानकारी गराउन निर्देशन दिएको छ ।

गृहमन्त्री बादल, उर्जामन्त्री टोपबहादुर रायमाझी, खानेपानी मन्त्री मणि थापा, सिँचाईमन्त्री प्रभु शाह, खेलकुदमन्त्री दावा लामा र श्रममन्त्री गौरीशंकर चौधरीलाई स्थायी कमिटी बैठकले मन्त्रिपरिषद्बाट फिर्ता हुन निर्देशन दिएको हो ।

एमालेका अध्यक्ष एवम् प्रधानमन्त्री खड्गप्रसाद ओलीले गृहमन्त्री बादलसहित माओवादी केन्द्रका २३ जना नेताहरुलाई केन्द्रीय सदस्यमा मनोनयन गरेका थिए । गृहमन्त्री बादललाई नेकपा एमालेको बागमती प्रदेशको इन्चार्जको जिम्मेवारी समेत दिईएको छ ।

यसैगरी केन्द्रीय सदस्यमा मनोनित हुनेहरुमा गृहमन्त्री बादलसँगै टोपबहादुर रायमाझी, लेखराज भट्ट, मणिचन्द थापा, प्रभु साह, टंक आङबुहाङ, पासाङ शेर्पा, ज्वाला साह, टेकबहादुर बलामी, कमल जंग, मनोज थापा, विषमलाल अधिकारी, लीलाबहादुर थापा, दधिराम न्यौपाने, दिनेश पन्थी, नवीन रोका, धर्मराज रेग्मी, डम्बर विष्ट, गौरीशंकर थारु, झपट बोहरा, दावा लामा र चन्द्रबहादुर खड्का रहेका छन् ।