काठमाडौं । राष्ट्रिय परीक्षा बोर्ड सानोठिमी भक्तपुरले कक्षा १२ को परीक्षाको नतिजा अर्को साता सार्वजनिक गर्ने भएको छ । साथै कक्षा ११ र १२ को ढिला पढाई सुरु भएको भन्दै जेठसम्म शैक्षिकसत्र कायम गर्ने प्रस्ताव बोर्डले शिक्षा मन्त्रालयमा पठाएको छ ।

बोर्डका अध्यक्ष प्रा.डा.चन्द्रमणि पौडेलका अनुसार जेठसम्म कक्षा सञ्चालन गरी असारमा परीक्षा लिन सकिनेछ । बोर्डको यो प्रस्तावलाई शिक्षा मन्त्रालयले मन्त्रिपरिषद्मा लगेको पनि अध्यक्ष प्रा.डा.पौडेलले जानकारी दिनुभयो ।

शिक्षा पत्रकार सञ्जाल नेपाल (इजोन)ले आयोजना गरेको कार्यक्रममा बोल्दै अध्यक्ष प्रा.डा.पौडेलले कक्षा १२ का विद्यार्थीको नम्बर इन्ट्रीको काम सकिएको र अहिले रुजु चलिरहेको जानकारी गराउनुभयो । अध्यक्ष प्रा.डा. पौडेलले भन्नुभयो–‘४० प्रतिशत रुजुको काम सकिईसकेको छ, अब छिट्टै परीक्षाको नतिजा सार्वजनिक गछौं ।’

कक्षा १२ को परीक्षामा केन्द्राध्यक्षले भद्रगोल तरिकाले काम गर्नाले भनेको समयमा बोर्डले नतिजा प्रकाशन गर्न नसकेको अध्यक्ष प्रा.डा. पौडेलको भनाई थियो । अध्यक्ष प्रा.डा.पौडेलले भन्नुभयो–‘कार्यविधि पढेर त्यसअनुसारको काम पनि केन्द्राध्यक्षहरुले गरेको पाइएन । भद्रगोल गरिकाले परीक्षाको कामहरु भएका छन् । उत्तरपुस्तिका क्रमशः नराखेको, एउटा विषयको उत्तरपुस्तिका अर्को विषयमा राखेर पठाएको र पूर्णाङ भन्दा बढि नम्बर दिईएका र आन्तरिक मूल्यांकनमा समेत तोकिएभन्दा बढी नम्बर पठाईएका छन् ।’

परीक्षा बोर्डले विद्यालयका प्रधानाध्यापक जसलाई परीक्षाको केन्द्राध्यक्ष तोकेर अभिमुखीकरण तालिम समेत दिएको थियो । कोभिड–१९ (कोरोना भाइरस)का कारण वैशाख ८ गते हुने परीक्षा मंसीर ९ गते भएको थियो । जसमा चारलाख ३३ हजार दुईसय परीक्षार्थी सहभागी हुन आवेदन दिएका थिए । सबै परीक्षार्थीहरुलाई पायक पर्ने गरी चारहजार एकसय पाँच परीक्षा केन्द्रमा परीक्षा सञ्चालन गरिएको थियो ।