वासुदेव पौडेल
पोखरा । गाउँ पर्यटन प्रवद्र्धन मञ्च(भिटोफ) नेपाल गण्डकी प्रदेशद्वारा आयोजित चार दिवशीय पर्यटन पुर्नउत्थान एवम् ग्रामीण पर्यटन प्रवद्र्धन कार्यक्रम ग्रामिण पर्यटनमा उत्साह जगाउँदै सकिएको छ ।

नेपाल पर्यटन बोर्ड पोखराको प्रवद्र्धन र पोखरा पर्यटन परिषद्को सहयोगमा गत शनिबारदेखि सुरु प्रवद्र्धनात्मक भ्रमण कोरोना कहरसँगै सुस्ताएको पर्यटनलाई चलायमान बनाउन महत्वपूर्ण हुने विश्वास लिइएको छ ।

भ्रमणका क्रममा कास्की, पर्वत र बाग्लुङमा सञ्चालित विभिन्न होमस्टेका साथै पर्यटकीय स्थलको अवलोकन एवम् अन्तरक्रिया गरिएको कार्यक्रम संयोजक एवम् भिटोफ नेपाल गण्डकी प्रदेशका उपाध्यष सूर्यनाथ पहारीले जानकारी दिनुभयो । पोखरादेखि ढोरपाटनसम्मको प्रवद्र्धनात्मक यात्रामा पर्यटनसम्बद्ध संस्थाका प्रतिनिधि एवम् सञ्चारकर्मीको सहभागिता रहेको उहाँले जानकारी गराउनुभयो ।

नेपाल पर्यटन बोर्ड पोखराको प्रवद्र्धन र पोखरा पर्यटन परिषद्को सहयोगमा सञ्चालित उक्त कार्यक्रम अन्तर्गत टोलीले मंगलबार पर्वतको मोदी गाउँपालिका वडा नं १ का लप्सीबोट सामूदायिक होमस्टे र भुकदेउराली नमूना गाउँ सामूदायिक होमस्टे एवम् कास्कीको धिताल ह्याङ्जाकोट सामूदायिक होमस्टेको प्रवद्र्धनात्मक भ्रमण गरेको छ ।

उक्त कार्यक्रम अन्तर्गत प्रवद्र्धन टोली होमस्टेमा पुगी सरोकारवालाबीच अन्तरक्रिया समेत गरेको छ । भुकदेउराली नमूना गाउँ सामूदायिक होमस्टेमा आयोजित अन्तरक्रियामा गण्डकी प्रदेश सभा सदस्य ललितकला गुरुङले प्रकृति र संस्कृतिले सम्पन्न भुकदेउराली प्रवद्र्धनको पर्खाइमा रहेको बताउनुभयो ।

भुकदेउराली लगायत आसपासका पर्यटकीय गन्तव्यको विकासलाई आँफूले प्राथमिकतामा राखेको उहाँले बताउनुभयो । पोखरा पर्यटन परिषद्का अध्यक्ष गोपिबहादुर भट्टराईले सुन्दर गाउँहरूको पर्यटकीय विकासका लागि सरकारको चासो पुग्नुपर्ने बताउनुभयो । गाउँका सुन्दर संरचना जोगाउँदै बाटोघाटो लगायतका पूर्वाधार विकास गर्नुपर्ने उहाँले बताउनुभयो ।

भिटोफ नेपाल गण्डकी प्रदेशका अध्यक्ष नवराज अधिकारीले भुकदेउराली लगायतका स्थानको धेरै पर्यटकीय सम्भावना रहेको बताउँदै यिनीहरूको प्रवद्र्धनलाई भिटोफले प्राथमिकतामा राखेको बताउनुभयो ।

भुकदेउराली सामूदायिक होमस्टेका अध्यक्ष टेकबहादुर गुरुङले गाउँमा पूर्वाधार विकासका लागि स्वदेश तथा विदेशमा रहेका स्थानीयले जागरुकता देखाएको बताउँदै राज्यले पूर्वाधार तथा विकासलाई प्राथमिकतामा राख्नुपर्ने आवश्यकता औंल्याउनुभयो ।

टान पश्चिमाञ्चल क्षेत्रीय संघका अध्यक्ष सुशिलराज पौडेलले सुन्दर गाउँलाई पदयात्रा पर्यटनसँग जोड्दै पर्यटकीय विकास गर्ने कुरामा आँफूहरू सक्रिय बनेको बताउनुभयो ।

कार्यक्रममा होमस्टेका सचिव अन्तिम गुरुङ, टोल सुधार समितिका अध्यक्ष रामबहादुर गुरुङ, मोदी गाउँपालिका वडा नं १ का कार्यबाहक अध्यक्ष भुलबहादुर पौडेल, पर्यटन व्यवसायी उदय सुवेदी लगायतले सुन्दर गाउँका प्रकृति र संस्कृतिलाई पर्यटनसँग जोड्नुपर्ने आवश्यकता औंल्याउनुभयो । भ्रमण टोलीले मंगलबार अन्नपूर्ण गाउँपालिका वडा नं ७ मा सञ्चालित काल्सी इको लज पुगी त्यहाँका सञ्चालक चित्रबहादुर गुरुङसँग पनि अन्तरक्रिया गरेको छ ।