पोखरा । उच्च अदालत पोखराले तत्कालका लागि पार्किङ शुल्क नउठाउन दिएको अन्तरिम आदेश विपरित धमाधम पार्किङ शुल्क उठाउने काम भएको छ । अदालतको आदेशलाई ठाडै उल्लंघन गर्दै फेवा–सावित्री (जेभी) कम्पनीले रकम उठाई रहेको छ ।

जागौं पोखरा अभियानका अभियन्ता दीपक आचार्यले पोखरा महानगरपालिका र फेवा–सावित्री (जेभी)ले अदालतको आदेशको पालना गर्नुपर्नेमा अवहेलना भएकोले यसका विरुद्धमा कानुनी उपचारमा जाने बताउनुभयो ।

पोखरा महानगरपालिकाले यतिबेला सडकमा नै राखिएका सवारीसाधनहरुबाट पार्किङ शुल्क उठाई रहेको छ । यसलाई व्यवस्थापन गर्ने र पार्किङका लागि छुट्टै स्थान निर्माण नगरी अस्तव्यस्त सडकमा नै पार्किङ गराएर जबरजस्ती रकम असुल्ने काम भईरहेको छ ।

दुई वर्षका लागि पार्किङ शुल्क उठाउन तीन करोड १६ लाख रुपैयाँमा सम्झौता गरेको फेवा–सावित्री (जेभी) कम्पनीले जबरजस्ती रकम असुल्दै आईरहेको छ । कम्पनीले मोटरसाईकल, निजी सवारी साधन र भाडाका सवारी साधनको छुट्टछुट्टै पार्किङ शुल्क तय गरेको छ ।

मोटरसाईकललाई १० रुपैयाँ, जिप, भ्यान लगायतका हल्का सवारीलाई प्रतिघण्टा १५ रुपैयाँ, मझौला सवारी साधनलाई प्रति घण्टा २० रुपैयाँ, ठुला सवारी साधन ट्रक लगायतलाई प्रतिघण्टा ३० रुपैयाँ पार्किङ शुल्क वापत उठाउने काम भईरहेको छ ।

त्यसैगरी संस्थागत सवारी साधनको हकमा भने ट्याक्सीको लागि १ हजार र नगरबसको लागि १५ सय रुपैयाँ मासिक रुपमा पार्किङ शुल्क उठाउने काम भएको छ । अन्य क्षेत्रमा भने मोटरसाईकलको १० रुपैयाँ, हल्का र मझौला सवारी साधनलाई क्रमशः १५ र २० रुपैयाँ तोकिएको छ ।

उच्च अदालतको आदेश विपरित पोखरामा पार्किङ शुल्क उठाउँदै । तस्विरः दामोदर बराल/डन न्यूज