बलेवा । नेपाल पत्रकार महासङ्घ बाग्लुङ शाखाले कोभिड–१९ को बहानामा कामबाट निकालिएका पत्रकारलाई बहाली गर्न र नियमित रुपमा तोकिएको तलब उपलब्ध गराउन माग गरेको छ । कोभिड–१९ को बहानामा सञ्चारमाध्यममा कार्यरत पत्रकारलाई कामबाट निकाल्ने, तलब नदिने, कोरोनाको बहाना बनाएर बिदा दिने जस्ता कार्यप्रति गम्भीर ध्यानाकर्षण भएको महासङ्घले जनाएको छ ।

नेपाल पत्रकार महासङ्घ बागलुङ शाखाको १२औँं वार्षिक साधारणसभा विभिन्न १० बुँदे समसामयिक प्रस्ताव पारित गर्दै महासङ्घले कुनै पनि बहानामा श्रमजीविको पारिश्रमिक रोकिन नहुने जनाएको हो । पत्रकारिता क्षेत्रमा क्रियाशील पत्रकारका लागि बनेको श्रमजीवी पत्रकार ऐन कार्यान्वयनका लागि सम्पूर्ण सञ्चारमाध्यमलाई आह्वान गर्र्दै कार्यान्वयनको अवस्थाको महासङ्घले अनुगमन गर्ने र कार्यान्वयन नभएको पाइएमा खबरदारी गर्ने प्रस्ताव साधारणसभाबाट पारित गगरेको छ ।

सूचनाको हक पूर्ण कार्यान्वयन गरी सञ्चारमाध्यमलाई आफ्नो कार्यालय तथा सङ्घ संस्थाको सूचना उपलब्ध गराउन तथा त्रैमासिक रुपमा कार्यसम्पादन सार्वजनिक गर्न मागसमेत गरिएको छ । पत्रकारको क्षमता विकास, पेशागत सुरक्षाको आवश्यक व्यवस्थापन गर्न सबै सञ्चारमाध्यमलाई महासङ्घले आग्रह गरेको छ । समाचारको विषयलाई लिएर पत्रकारलाई डर, धम्की दिने, प्रलोभन देखाउने, अनावश्यक लाञ्छनालगायत जस्ता कार्य नगर्न तथा समाचारप्रति कुनै गुनासो भएमा प्रक्रियागत ढङ्गले अगाडि बढ्न सरोकारवालालाई आग्रह गरेको छ ।

स्थानीय तह, प्रदेश सरकार र सङ्घीय सरकारले सञ्चार क्षेत्रका लागि दिने विज्ञापन नीतिलाई प्रभावकारी बनाइ समानुपातिक रुपमा वितरण गर्न तथा स्थानीय विज्ञापन स्थानीय सञ्चारमाध्यममै दिने व्यवथा गर्न सचिव रामबहादुर थापाले प्रेस विज्ञप्तिमार्फत जानकारी गराउनुभएको छ ।