पोखरा । लकडाउनको समयलाई सदुपयोग गर्दै पत्रकार दुर्गा अधिकारीले ‘समाज, सञ्चार र राजनीति’ लेख संग्रह सार्वजनिक गर्नुभएको छ । रेडियो सफलता १०३.४ मेगाहर्जका प्रबन्ध निर्देशक अधिकारीको पुस्तकको विमोचन राष्ट्रिय सभाका अध्यक्ष गणेशप्रसाद तिमिल्सिनाले गर्नुभएको हो ।

राष्ट्रिय सभाका अध्यक्ष तिमिल्सिनाले कोभिड नियन्त्रणमा सही सूचना सम्प्रेषण गर्दै सञ्चारकर्मीहरुले नेतृत्वदायी भूमिका निर्वाह गर्दै आईरहेको बताउनुभयो । अध्यक्ष तिमिल्सिनाले भन्नुभयो–‘अमेरिका जस्तो विकसित राष्ट्रले कोभिड–१९ नियन्त्रण गर्न नसकेको अवस्थामा नेपाल सरकारले गरेको काम र प्रयासलाई अवमूल्यन गर्न हुँदैन ।’

पत्रकार तथा अन्नपूर्ण पोष्ट गण्डकी व्युरोका प्रमुख केशवशरण लामिछानेले समाज र सञ्चारका कुरालाई तथ्यपरक ढंगले पुस्तकमा राखिएको र राजनीति सुन्दा एक थरिको तर भोगाई फरक हुने विषयलाई यस पुस्तकमा उठान गरिएको बताउनुभयो ।

त्यसैगरी नेपाल पत्रकार महासंघ कास्कीका अध्यक्ष दीपेन्द्र श्रेष्ठले पुस्तक लेखहरुको त्रिवेणी भएको बताउनुभयो । समाजका प्रवृत्ति, सञ्चार र राजनीतिलाई बुझ्नका लागि पुस्तकले सहायता गर्ने श्रेष्ठको विश्वास थियो ।

रेडियोबाट आफ्नो विचार प्रस्तुत गरेपनि पछिसम्मका लागि रेकर्ड रहने गरी छापा माध्यमबाट प्रकाशित गर्न प्रभावकारी हुने ठानेरै पुस्तक प्रकाशन गरेको पत्रकार अधिकारीको भनाई थियो । पुस्तक विमोचन पश्चात् आफु झन् प्रेरित भएको र अझ निखारताका साथ अगाडि बढ्ने प्रतिवद्धता पत्रकार अधिकारीले व्यक्त गर्नुभयो ।

सफलता मिडिया प्रा.लि.का निर्देशक गोविन्द कोइरालाको अध्यक्षतामा भएको कार्यक्रममा स्वागत सञ्चारकर्मी पार्वता पौडेल र सञ्चालन समाचार वाचिका अन्जु बरालले गर्नुभएको थियो ।