पोखरा, १५ माघ । पत्रकार धन बस्नेत लाई वर्ष २०८१ को र सागरराज तिमिल्सिनालाई वर्ष २०८२ को लागि टंकादेवी–तुलसीप्रसाद पत्रकारिता पुरस्कार प्रदान गरिएको छ ।

कार्यक्रममा गण्डकी विश्वविद्यालयका कुलपति प्राडा इन्द्रप्रसाद तिवारी, गण्डकी प्रदेशका प्रेस रजिष्ट्रार बिमला भण्डारी र महासंघ कास्कीका पूर्व अध्यक्ष माधव शर्माले उनीहरूलाई जनही २५ हजार १११ रुपैयाँ नगद र सम्मानपत्र प्रदान गरेका थिए ।

धन बस्नेत खेलाडीन्यूज डटकम र टक्सार म्यागेजिनमा काम गर्छन् । उनले २०६० सालमा नेपाल समाचारपत्रबाट पत्रकारिता सुरु गरेका थिए । नागरिक दैनिकमा पनि लामो समय काम गरे । यसअघि उनले सहारा खेलकुद पत्रकारिता पुरस्कार र कास्की जिल्ला खेलकुद विकास समितिको उत्कृष्ट खेल पत्रकार पुरस्कार पाइसकेका छन् ।

सागरराज तिमिल्सिना एपिवान टिभी र क्लिक गण्डकीमा आवद्ध छन् । उनले २०५९ सालमा पोखरा एफएमबाट पत्रकारिता सुरु गरेका थिए । समाधान दैनिक, रेडियो तरङ्ग, उज्यालो रेडियो नेटवर्क, विग एफएम, एभिन्यूज, सेतोपाटी र गन्थन डटकममा पनि काम गरिसकेका छन् । उनले पनि सहारा खेलकुद पुरस्कार, कास्कीको उत्कृष्ट खेल पत्रकार पुरस्कार, नेपाल खेलकुद पत्रकार मञ्च गण्डकीको वर्ष उत्कृष्ट खेल पत्रकार अवार्ड र रेवान पोखराको पर्यटन पत्रकारिता पुरस्कार जितिसकेका छन् ।

पुरस्कार छनोटका लागि महासंघ कास्कीका पूर्व अध्यक्ष नारायण कार्की संयोजक रहेको समिति बनाइएको थियो । कार्यक्रम नेपाल पत्रकार महासंघ कास्कीका अध्यक्ष माधवप्रसाद बरालको अध्यक्षतामा भएको थियो । विभिन्न वक्ताले पुरस्कृत पत्रकारहरूलाई बधाई दिँदै पत्रकारहरूको हकहितका लागि काम गर्ने प्रतिबद्धता गरेको महासंघ कास्कीका सचिव भूपाल गुरुङले जानकारी दिए ।