मुस्ताङ, ११ कार्तिक । मुस्ताङमा यो यामको पहिलो हिमपात सुरु भएको छ। कोरलानाका, लोमान्थाङ गाउँपालिका र मुक्तिनाथ क्षेत्रमा आज बिहानदेखि हिमपात भइरहेको जिल्ला प्रशासन कार्यालयले जनाएको छ।

प्रमुख जिल्ला अधिकारी विष्णुप्रसाद भुसालका अनुसार लोमान्थाङ–२ छोसर, कोरलानाका, मुक्तिनाथसहित उपल्लो र तल्लो मुस्ताङका उच्च लेकहरूमा वर्षासँगै हिमपात भएको छ।

मुक्तिनाथ विकास समितिका कर्मचारी रविन सुवेदीले मुक्तिनाथमा बिहानदेखि निरन्तर हिउँ परिरहेको बताए। “हिउँ ५–६ इन्च जति जमेको छ, तर जमिन तातो भएकाले पूर्ण रूपमा जम्न सकेको छैन,” उनले भने, “यही क्रम जारी रहे दुई फिटसम्म हिउँ जम्न सक्छ।” हिउँका कारण मन्दिर दर्शन गर्न आउनेहरूलाई समस्या परेको छ।

लोघेकर दामोदरकुण्ड गाउँपालिका अध्यक्ष लोप्साङ छोम्फेल विष्टका अनुसार उच्च लेकमा हिमपात भइरहेको छ भने बस्ती नजिक वर्षासँगै आंशिक हिउँ परेको छ। “कात्तिकमै हिउँ पर्‍यो, दुई–तीन वर्षदेखि यस्तो भएको थिएन,” उनले भने, “हिउँ किसानका लागि वरदान हो, यसले अन्नबाली उत्पादन बढाउँछ।”

वारागुङ मुक्तिक्षेत्रका वडाध्यक्ष प्रमेश गुरुङले खिङ्गा, झोङ, छेङ्गुर, फल्याकलगायत गाउँमा बाक्लो हिउँ परेको जानकारी दिए। चिसो अत्यधिक बढेकाले जनजीवन प्रभावित भएको छ। “स्याउलगायत बालीलाई फाइदा पुग्छ, हिउँले जमिनको भित्री तहसम्म पानी पर्‍याउँछ,” उनले थपे।

मुक्तिनाथसम्म यात्रा नगर्न प्रशासनको अनुरोध
जिल्ला प्रशासन कार्यालयले कागबेनीदेखि माथि मुक्तिनाथसम्म यात्रा नगर्न अनुरोध गरेको छ। सडकमा बाक्लो हिउँ जमेकाले दुर्घटनाको जोखिम रहेको जनाइएको छ।

जिल्ला प्रहरी कार्यालयका प्रहरी नायब उपरीक्षक छिरिङ किप्पा लामाका अनुसार जोमसोम–मुक्तिनाथ सडकको कालोभिर, खिङ्गा, झारकोटलगायत ठाउँमा हिउँ जमेकाले सवारीसाधन नलैजान आग्रह गरिएको छ। साँघुरो र घुम्ती मोड भएको कालोपत्र सडक जोखिमपूर्ण बनेको छ।