पोखरा, १४ भदौ । नेपाल एसोसिएसन अफ टुर्स एन्ड ट्राभल एजेन्ट्स (नाट्टा) गण्डकीको ३०औँ वार्षिक साधारणसभामा होलिडे एडभेन्चर टुर्स एन्ड ट्राभल्सका म्यानेजर चिरञ्जीवी काफ्लेलाई ‘मनोहरा सिग्देल स्मृति पर्यटन पुरस्कार’ प्रदान गरिने भएको छ। उनलाई दश हजार रुपैयाँ नगद, प्रमाणपत्र र दोसल्लाले सम्मानित गरिनेछ।

नाट्टा गण्डकीका पूर्वअध्यक्ष सञ्जयकान्त सिग्देलले आफ्नी ममतामयी आमा मनोहराको स्मृतिमा स्थापना गरेको एक लाख एघार हजार रुपैयाँको अक्षयकोषबाट प्रत्येक वर्ष नाट्टा गण्डकीका सदस्य कम्पनीहरूमा कार्यरत सबैभन्दा पुराना कर्मचारीमध्ये एक जनालाई यो पुरस्कार प्रदान गरिन्छ।

नाट्टा गण्डकीका द्वितीय उपाध्यक्ष राजेश पहारीको संयोजकत्वमा सन्दीप श्रेष्ठ, छविरमण पौडेल, पदम आचार्य र वासुदेव त्रिपाठी सदस्य रहेको सम्मान छनोट समितिको सिफारिसका आधारमा काफ्लेलाई पुरस्कृत गर्न लागिएको हो। स्याङ्जामा जन्मिएर हुर्केका काफ्लेले वि.सं. २०७० साउन १० गतेदेखि उक्त कम्पनीमा कुशलतापूर्वक काम गर्दै आएका छन्।

यस पुरस्कारबाट यसअघि देवराज देवकोटा, अशोक पौडेल, निराजन कुँवर र रामप्रसाद दुवाडी सम्मानित भइसकेका छन्।