स्याङ्जा, २९ फागुन । राष्ट्रिय प्रजातन्त्र पार्टी (राप्रपा) स्याङ्जाको आँधीखोला गाउँपालिकाको पाँचौ अधिवेशनले सूर्यबहादुर ढकालको अध्यक्षतामा सात सदस्यीय नयाँ कार्य समिति चयन गरेको छ ।

आँधीखोला गाउँपालिका वडा नं. ५ जुग्लेमा सम्पन्न पाँचौ अधिवेशनले उपाध्यक्ष र सचिव पछि टुङ्गयाउने गरी कोषाध्यक्षमा हिरा अधिकारी निर्वाचित भएका छन् । यसअघि पालिकाको ६ वटै वडामा अधिवेशन सम्पन्न भई नयाँ नेतृत्व चयन गरिएको छ । वडा नम्बर–१ मा भुवानीप्रसाद लामिछाने, वडा नं. २ मा निर्मला विक, वडा नं. ३ मा ओमप्रकाश शर्मा, वडा नं. ४ मा दुर्गाप्रसाद उपाध्यय, वडा नं. ५ मा कृष्णबहादुर क्षेत्री र वडा नं. ६ ओमबहादुर गुरूङ रहेका छन् ।

बिहीबार सम्पन्न भएको अधिवेशनमा राप्रपा गण्डकी प्रदेशका अध्यक्ष पञ्चराम गुरूङले देशमा यस्तै खालका धेरै उथलपुथल र जनसागरबाट नै व्यवस्था परिवर्तन भएको स्मरण गराए । देशमा संघीयता आएपछि जनताको दैनिकी परिवर्तन हुन्छ भन्ने आशा पूरा हुन नसकेको, वेथिति र भ्रष्टाचार झनैं मौलाउँदैं जानाले जनतालाई दलहरुप्रति वितृष्णा बढेको बताए ।

‘च्याउ उम्रे झैं देशमा उम्रिएका पार्टी र तिनीहरुले चुनावको बेलामा बाँड्ने झुटो आश्वासनबाट जनता आजित भईसकेका छन्,’ नेता गुरुङले भने–‘जनतासँग चुनावको समयमा मात्र देश परिवर्तनको सपना बाँड्ने र सत्तामा पुगेपछि आफ्ना भ्रष्ट नेता, कार्यकर्ता र दलालहरुलाई बचाउने काममा सिङ्गो राज्य संयन्त्र नै परिचालन गर्ने प्रवृत्तिले नयाँ परिवर्तनको खाँचो देखिएको छ ।’

गण्डकी प्रदेश सरकारका पूर्वमन्त्रीसमेत रहेका प्रदेशसभा सदस्य गुरूङले अहिलेका नेता देश र जनता भन्दा पनि आफ्नो जीवनशैली परिवर्तन गर्नतिर उन्मूख हुँदा देश झनैं संकटमा फस्दैं गएको बताए ।

‘राजा फाले विकास हुन्छ, जनताको अवस्था फेरिन्छ भनेर जुन झुठो आश्वासन दलहरुले दिए, हामीहरुले ठिक छ हेरौं न त भनेर हामी मौन बस्यौ’,उनले भने,–‘समर्थन पनि गर्यौं । तर, खोई यत्तिका वर्ष बितिसक्दा पनि जनताको अवस्था फेरिएको ?’

धर्मको नाममा विदेशी डलर कुम्ल्याएर धर्म निरपेक्षता गरिएको बताउँदै नेता गुरुङले उक्त रकमबाट नेपाली नेता धनाढ्य र देशको धर्मसंस्कृति ध्वस्त भएको आरोप पनि लगाए । ‘हामीले राजतन्त्र होईन राजसंस्था ल्याउने हो,’ उनले दोहोर्याए, ‘राजाको बेला तानाशाही थियो भनेर भ्रम फैलाइएको छ । २०४७ साल अघि राजाले पनि संविधान अनुसार नै काम गरेको छ । अहिलेका नेता राजा भन्दा माथी भए । यिनीहरूलाई जनताले परीक्षा गरिसके ।’

उनले नेताले पटकपटक गरेका गल्तीलाई माफ दिन नसकिने बताउदै राप्रपा आफ्नो मूल्य र मान्यतालाई आत्मसाथ राख्दै अघि बढेको तर्क राखे ।

१० वर्षे द्वन्द्वले केही नयाँ अवसर ल्याएको भए पनि १० वर्ष पछाडि पनि धकेलेको उनको भनाई थियो । ‘अब जनता एक ठाउँमा उभिएर देशलाई नविन समझदारीबाट निकास दिने गरी उभिन आवश्यक छ’, उनले भने ।

केन्द्रीय सदस्य हिक्मतजंग कार्कीले पूर्वराजा ज्ञानेन्द्र शाहको भव्य स्वागतले नेपाली नागरिकलाई उत्साहित बनाएको बताए। ‘राजाको भ्रमणले जनता राजा र राजतन्त्रको पक्षमा रहेको देखाउँछ’ उनले भने, ‘स्याङ्जामा लागेको भीड, पोखराका नागरिकको उपस्थिति र राजाको काठमाडौंको भव्य स्वागतले यो प्रमाणित गर्दछ।’

उनले गणतन्त्रले मुलुकको न्याय नगरेको बताउँदै सरकारले जनताको आधारभूत आवश्यकता पूरा गर्नसमेत नसकेको बताए। गणतन्त्रले गाउँमा विकास नल्याएको उनको दाबी छ। ‘अहिले सरकार कहाँबाट कसरी लुट्न सकिन्छ भन्नेतिर केन्द्रीत छ। ठूला दुई दलले सरकार चलाएका छन्। बाहिर देखाउँदा एकथरी, भित्र अर्कै छन्,’ उनले भने, ‘प्रतिपक्षमा बस्दा अवसर नपाउने र माओवादीले एकलौटी नेतृत्व गर्दा एक्लै खायो भनी काँग्रेस र एमालेले रातारात सरकार बनाए।’ उनले हिन्दु राष्ट्रसहित राजसंस्था आएपछि जनताको समस्या र गुनासा सम्बोधन हुने विचार पनि व्यक्त गरे।