पोखरा, १० वैशाख । विन्दवासिनी बचत तथा ऋण सहकारीको करिब ७ करोड रुपैयाँ डुबाउने मुख्य अभियुक्तहरु मध्ये सचिव गंगाधर सुवेदीलाई यतिबेला सेटिङमा छुटाउने तयारी भईरहेको भन्दैं पीडित बचतकर्ताहरुले त्यसो नगर्न अदालतलाई आग्रह गरेका छन् । एकै प्रकृतिको सहकारी ठगी मुद्दामा जिल्ला अदालत कास्कीमा हुने फरक–फरक निर्णयका पछाडी कानुनी व्यवसायीमार्फत् अदालतसम्म गरिने आर्थिक चलखेल र राजनीतिक दवाव नैं मुख्य कारण भएको भन्दैं बचतकर्ताहरु सशंकित भएका हुन् ।

आइतबार हिजो आफैं अदालतमा उपस्थित भएका सचिव सुवेदीको बयान नसकिएपछि प्रहरी थुनामा राखिएको छ । सुवेदीको आज सोमबार न्यायाधीश हरिप्रसाद कोइरालाको इजलासमा थुनछेक बहस हुँदैंछ । तर बाहिर लाखौं खर्च गरी कानुनी व्यवसायीमार्फत् अदालत र न्यायाधीशसम्म सेटिङ मिलाएर आफू सहजैं उम्किने र बचतकर्ताहरुले आफूलाई केही गर्न नसक्ने धम्की उनी र उनका आफन्तहरुले दिएको भन्दैं पीडित बचतकर्ताहरुले न्याय परिषद र सम्बन्धित निकायले राम्रोसँग यस्ता मुद्दाहरुको छानबिन गर्नुपर्ने माग राखेका छन् ।

सहकारी ठगी सम्बन्धि मुद्दामा कास्कीका विभिन्न सहकारीमा एकै प्रकृतिका मुद्दामा पनि न्यायाधिशहरुले फरक–फरक निर्णय र धरौंटी माग समेत असाध्यैं न्यून गरिरहेको अवस्थामा कास्कीसँगैं रहेको अन्य जिल्लाहरुमा भने यहाँको भन्दा ठ्याक्कैं फरक पीडित बचतकर्ताको पक्षमा न्यायाधीशहरुले निर्णय गरिरहेका छन् । प्रहरी प्रशासनदेखि न्यायालयसम्म लाखौं रुपैयाँ चलखेल गरी मुद्दा कमजोर पार्ने र पीडकलाई उन्मुक्ति दिईने घटना भने नौंलो र पुराना होइनन् ।

पोखरामा भएको सहकारी ठगी र बचतकर्ताको रकम हिनामिना गरिएको मध्ये अहिलेसम्म अदालतमा आएको मुद्दामा सबैभन्दा थोरै रकम विन्दवासिनी सहकारीको रहेको छ । जिल्ला सरकारी वकिलको कार्यालय कास्कीले ३१ जनालाई प्रतिवादी बनाउँदैं २०८० चैत १५ गते मुद्दा दर्ता गरेको थियो । सहकारी ऐन २०७४ को दफा १२२ र दफा १२४ अनुसार सहकारी ठगीमा मुद्दा चलाईएको थियो ।

यो सहकारीमा अध्यक्ष सुवर्णमान नकर्मी र सचिव गंगाधर सुवेदी मिलेर सहकारीको रकम किर्ते कागजपत्र बनाएर, सहकारी ऐन र प्रचलित कानुन विपरित ठगी गरेका थिए । यस ठगीमा सचिव सुवेदीका आफ्नैं सानीआमाका छोरा भाइ नाता पर्ने उदिप सन्दिप पौडेल पनि संलग्न छन् । तर अदालतले यसअघि नैं उदिपसन्दिपलाई असाध्यैं न्यून धरौंटीमा छोडिसकेको छ ।

सहकारीका अध्यक्ष नकर्मी र सचिव सुवेदी मिलेर सहकारीको नाममा रहेको साढे ५ करोडको जग्गा व्यक्तिगत नाममा ल्याई सहकारीको रकम हिनामिना गरेका थिए । अध्यक्ष नकर्मी र सचिव गंगाधर सुवेदी मिलेर कार्य समितिका अन्य पदाधिकारीहरु समेतको किर्ते हस्ताक्षर गरी रकम दुरुपयोग तथा हिनामिना गरेका थिए । साथै सहकारीको नाममा रहेको कि.नं. ८९३२ सिट नं. ०९०११६७१ को क्षेत्रफल ३.१.३.० मो जग्गा समेत किर्ते गरी बेचबिखन गरेका थिए । उनीहरुले यो ठगी काण्डमा सहकारीको झण्डै ५ करोड रुपैयाँ हिनामिना गरेका छन् । लम्की–चुहा नगरपालिका वडा नं. ६ कैलालीकी रेजिना विष्ट र पोखरा–१७, विरौटा बस्ने उदितसन्दीप पौडेललाई योजनावद्ध ढंगले अध्यक्ष नकर्मी र सचिव सुवेदीले जग्गा नामसारी गरिदिएका थिए ।