शान्ति केसीको चितवनको गर्दी वडा नं. ३ मा रहेको जमिन साविक कित्ता नं. ६८ (०–३–१३–५–० विघा), ८१९(०–३–१२–० विघा) र ८२१ (०–१०–५.५–० विघा) करिब साढे ३२ कठ्ठा जमिन २०७९ भदौं २९ गते वडाध्यक्ष दीपकप्रसाद सुवेदीले एक रुपैयाँ पनि नदिई चलाखीपूर्ण ढंगले आफ्नो नाममा पास गरेका थिए ।

पोखरा, २९ फागुन । ठगी मुद्दामा २० दिनदेखि थुनामा रहेका नेकपा एमालेबाट निर्वाचित पोखरा–२१ का वडाध्यक्ष दीपकप्रसाद सुवेदीलाई कास्की प्रहरीले आज मंगलबार जिल्ला अदालत कास्कीबाट पुनः ५ दिनको म्याद थप गरेको छ ।

एक असहाय महिलाको साढे ३ करोड पर्ने जग्गा सित्तैंमा झुक्याएर आफ्नो नाममा पास गरी ठगी गरेको आरोपमा वडाध्यक्ष सुवेदीलाई प्रहरीले पक्राउ गरेको थियो । सोही मुद्दामा प्रहरीले थप अनुसन्धान गर्न आज मंगलबार जिल्ला अदालत कास्कीबाट ५ दिनको म्याद थप गरेको जिल्ला प्रहरी कार्यालय कास्कीका प्रमुख एसपी मोहनकुमार थापाले जानकारी दिए ।

पोखरा–१० रामबजार बस्ने शान्ति केसीको चितवनमा रहेको साढे तीन करोड रुपैयाँभन्दा बढि पर्ने जग्गा वडाध्यक्ष सुवेदीले चलाखीपूर्ण ढंगले सहकारीका सञ्चालकसँग मिलेर सित्तैमा आफ्नो नाममा पास गरेका थिए । सहकारीमा धितोमा राखिएको उक्त जमिन सित्तैमा हडपेका वडाध्यक्ष सुवेदीले ती महिलालाई सो जग्गा चाहिए २ करोड रुपैयाँ दिनुपर्ने भन्दैं धम्क्याउँदैं आईरहेका थिए ।

शान्ति केसीको चितवनको गर्दी वडा नं. ३ मा रहेको जमिन साविक कित्ता नं. ६८ (०–३–१३–५–० विघा), ८१९(०–३–१२–० विघा) र ८२१ (०–१०–५.५–० विघा) करिब साढे ३२ कठ्ठा जमिन २०७९ भदौं २९ गते वडाध्यक्ष सुवेदीले एक रुपैयाँ पनि नदिई चलाखीपूर्ण ढंगले आफ्नो नाममा पास गरेका थिए ।

पोखराको नयाँ बजारमा रहेको मित्रमिलन बचत तथा ऋण सहकारी संस्थाका अध्यक्ष रमण पौडेल र वडाध्यक्ष सुवेदी मिलेर धितोमा रहेको उक्त जमिन व्यवहार मिलाउने नाममा चलाखीपूर्ण ढंगले लुटेको पीडित शान्ति केसीले डन न्यूजलाई बताईन् । उनले भनिन्–‘सहकारीमा धितो राखिएको उक्त जमिन सहकारीका अध्यक्ष लगायत सञ्चालकहरु र वडाध्यक्ष सुवेदी मिलेर लुट्ने काम गरियो । यिनीहरुलाई कडा भन्दा कडा कारवाही हुनुपर्दछ ।’

म्याद थप गर्नका लागि आज मंगलबार जिल्ला अदालत कास्कीमा वडाध्यक्ष दीपकप्रसाद सुवेदी लगायतलाई लैजाँदैं कास्की प्रहरी । तस्विर: राजेन्द्र अधिकारी

मित्रमिलन सहकारीमा पीडित महिला केसीले ८० लाख रुपैयाँ ऋण लिएकी थिईन् । केही समय ब्याज र किस्ता तिरेपनि पछिल्लो समय गारो भएपछि सहकारीका अध्यक्ष पौडेलले लिलामीमा निकाल्नु भन्दा बरु व्यवहार मिलाएर सल्टाउन पाए संस्था र दुवैलाई फाईदा हुने भन्दैं वडाध्यक्ष सुवेदीलाई पास गराई दिएको उनले बताईन् । यसरी जग्गा पास गरेपछि सहकारीका अध्यक्ष पौडेल र वडाध्यक्ष सुवेदी दुवै सम्पर्कविहिन भएपछि मात्र शान्ति केसीले आफू ठगिएको थाहा पाएकी थिईन् ।

पटक–पटक सहकारीका अध्यक्ष पौडेल र वडाध्यक्ष सुवेदीलाई सो जग्गा फिर्ता गरिदिन वा साढे तीन करोड रुपैयाँ दिन आग्रह गर्दा पनि उल्टै धम्क्याएपछि पीडित महिला केसीले बाध्य भएर प्रहरीमा ठगीको मुद्दा दर्ता गराएकी थिईन् ।

यता, सहकारी ठगीमा पक्राउ पुर्जी जारी भएसँगैं महिनौंसम्म फरार भएका वडाध्यक्ष सुवेदी अदालतमा उपस्थित भएकै दिन प्रहरीले अर्को ठगी मुद्दामा पक्राउ गर्न सफल भएको थियो । वडाध्यक्ष सुवेदीलाई मित्र मिलन सहकारी ठगीमा जिल्ला अदालत कास्कीका न्यायाधीश चन्द्रकान्त पौडेलको एकल ईजलासले ८ लाख धरौंटीमा रिहा हुने आदेश दिएको थियो ।

धरौंटी बुझाएर साँझपख अदालतबाट बाहिरिदैं गर्दा वडाध्यक्ष सुवेदीलाई वडा प्रहरी कार्यालय बैदामको टोलीले पक्राऊ गरेको थियो । जिल्ला प्रहरी कार्यालय कास्कीका प्रवक्ता डीएसपी श्रवणकुमार विकका अनुसार वडाध्यक्ष सुवेदीका विरुद्धमा पोखरा–१० रामबजार बस्ने शान्ति केसीले ठगी गरेको भन्दैं जाहेरी दर्ता गराएकी थिईन् ।

पोखराको नयाँ बजारमा रहेको मित्रमिलन बचत तथा ऋण सहकारी संस्थाका अध्यक्ष रमण पौडेलले ऋणी शान्ति केसीलाई व्यवहार मिलाउने नाममा सो जग्गा वडाध्यक्ष सुवेदीको नाममा पास गराएका थिए । तर वडाध्यक्ष सुवेदीले पैसा नदिएपछि सहकारीले फुकुवा दिएर धितो बिक्री भईसके पनि ती पीडित महिलाको नाममा पुनः ऋण कायम गरिएको वित्तिय अनुसन्धानका क्रममा भेट्टिएको थियो । यतिबेला ८० लाख ऋण लिएकी शान्ति केसीले धितो वापत राखिएको जमिन गुमाएकी मात्र छैनन्, उल्टैं सहकारीमा १ करोड २० लाख रुपैयाँ भन्दा बढि पैसा बुझाउनु पर्ने देखिएको छ ।

जिल्ला अदालत कास्कीमा म्याद थपका लागि ल्याउँदैं गर्दा पोखरा–२१ का वडाध्यक्ष दीपकप्रसाद सुवेदीसहित थुनुवाहरु ।

कास्की अदालतमा धमाधम सहकारी ठगीमा फरार भएकाहरुले राजनीतिक पहुँच, आर्थिक चलखेल र सेटिङ मिलाएर धमाधम धरौंटीमा रिहा हुन थालेपछि पीडितहरुले न्याय परिषदमा जाने तयारी गर्न बाध्य भएका थिए । सहकारीमा सर्वसाधारण जनताले बचत गरेको बचत रकम हिनामिना गर्ने पात्रहरुलाई अदालतले सामान्य धरौंटीमा छोड्न थालेपछि न्यायाधीशहरुको व्यापक आलोचना र विरोध भएको थियो ।

पीडितहरुले न्यायाधीशहरु आर्थिक प्रलोभनमा विकेको र ठगहरुलाई बचाउन गरिएको सेटिङको मतियार भएको आरोप लगाएका थिए । जुन आरोपलाई न्यायाधीशहरुले एकै प्रकृतिको मुद्दामा गरेका फरक–फरक फैसलाले पनि थप पुष्टि गरेको थियो ।

सहकारी ठगी मुद्दामा ८ लाख धरौंटीमा रिहा भए लगत्तैं सोही दिन पक्राउ परेका वडाध्यक्ष दीपकप्रसाद सुवेदी पुनः अर्को ठगी मुद्दामा प्रहरी थुनामा छन् । पहेलो घेरामा वडाध्यक्ष सुवेदी ।