सहकारीको रकम अध्यक्ष पौडेल, उपाध्यक्ष लम्साल, सहकारीका प्रेस सल्लाहकार अर्जुन गिरी र कानुनी सल्लाहकार जनकल्याण पराजुली लगायतको मिटरब्याजी समूहले विना रेकर्ड हिनामिना गरेपछि सञ्चालक पौडेल र कर्मचारी किरण यसअघि सहकारी बन्द गरेर भारत भागेका थिए ।

पोखरा, १२ कार्तिक । सर्वसाधारण जनताले बचत गरेको रकममाथि सञ्चालक, पत्रकार, वकिल, जनप्रतिनिधि र मिटरव्याजी गुण्डाहरुले अपचलन गरेको भन्दैं पीडितहरु आन्दोलित भएका छन् । सहकारीको करोडौं रकम हिनामिना गर्दै वेहिसाब खर्च गरेको तथ्यहरु सार्वजनिक हुन थालेपछि बचतकर्ताहरुले प्रहरीकोमा उजुरी दिएका हुन् ।

पोखराको नयाँबजारमा प्रधान कार्यालय रहेको मित्र मिलन बचत तथा ऋण सहकारी संस्थाको बचत रकम हिनामिना भएपछि पीडितहरुले गण्डकी प्रदेश अन्तर्गतको सहकारी रजिष्ट्रारको कार्यालय पोखरामा उजुरी दिएका थिए । बचतकर्ताको उजुरी लगत्तै सहकारी रजिष्ट्रार कार्यालयका निमित्त रजिष्ट्रार ईश्वरी ढकालले जिल्ला प्रहरी कार्यालय कास्कीलाई पत्र लेख्दैं आवश्यक छानबिन र कारवाहीको गर्न सिफारिस गरेकी हुन् ।

सहकारीका ३४ जना बचतकर्ताहरुले दर्ता गरेको निवेदनको सक्कलैप्रति पत्रसाथ संलग्न गरी निवेदकहरुको माग बमोजिम सो संस्थामा आवश्यक छानबिन गरी कारवाही प्रकृया अगाडि बढाउन सहकारी रजिष्ट्रारको कार्यालयले प्रहरीलाई अनुरोध गरेको छ । जिल्ला प्रहरी कार्यालय कास्कीका प्रमुख एसपी मोहन कुमार थापाले पत्र बुझ्दैं सहकारीको रकम अपचलन गर्ने जो कोहीलाई पनि नछाड्ने बताएका छन् । एसपी थापाले सहकारीको रकम हिनामिनामा संलग्न जो सुकै भएपनि कारवाही गरिने भन्दैं विश्वस्त रहन बचतकर्तालाई आग्रह गरे ।

पोखरा–९, नयाँबजारमा कार्यालय रहेको मित्र मिलन सहकारीले १ वर्षदेखि बचतकर्ताहरुलाई न त साँवा, न त ब्याँज नै दिन सकेको थियो । सहकारी बचतकर्ता सरस्वती सिग्देलले आफूले पाउनु पर्ने रकम नपाएपछि चेक अनादर मुद्दामा सोही सहकारीका अध्यक्ष रमण पौडेल र प्रमुख प्रशासकीय अधिकृत किरण अधिकारीका विरुद्ध उजुरी दिदाँ उनीहरु सात दिन देखि नैं प्रहरी हिरासतमा रहेका छन् ।

रकम वेहिसाब हिनामिना गर्ने सो सहकारीको सञ्चालक समितिको अध्यक्षमा पौडेल, उपाध्यक्षमा विजय लम्साल, सचिवमा कुशल पौडेल र कोषाध्यक्षमा भिमलाल पौडेल रहेका छन् । त्यसैगरी सदस्यहरुमा गोपाल खनाल, संगिता रेग्मी सुवेदी र रनिता थापा रहेका छन् । साथै लेखा समितिको संयोजकमा सुर्यबहादुर अधिकारी, प्रतिक लामिछाने, जनकराज पौडेल रहेका छन् ।

मित्र मिलन बचत तथा ऋण सहकारी संस्थाको सञ्चालक समिति

सहकारीको रकम सञ्चालकहरुले मनपरी जग्गा खरिद–बिक्री, मिटरब्याज, अनलाईन सञ्चालन, रेष्टुरेण्ट सञ्चालन, घर खरिदबिक्री र मोजमस्तीमा उडाएपछि बचतकर्ताहरु बाध्य भएर प्रहरीकोमा जान परेको एक बचतकर्ताले डन न्यूजलाई बताए ।

सहकारीको रकम ताण्डव न्यूज अनलाईन सञ्चालन, क्याफे दि गार्डेन रेष्टुरेण्ट सञ्चालन, नयाँबजारमा पत्रकार अर्जुन गिरीका नाममा घर खरिद, पोखरा र चितवन लगायतका विभिन्न ठाउँमा सञ्चालक र उनका परिवारका नाममा घरघडेरी लगायत क्षेत्रमा सहकारीको नियम विपरित लगानी गरिएको थियो ।

सहकारीको रकम अध्यक्ष पौडेल, उपाध्यक्ष लम्साल, सहकारीका प्रेस सल्लाहकार अर्जुन गिरी र कानुनी सल्लाहकार जनकल्याण पराजुली लगायतको मिटरब्याजी समूहले विना रेकर्ड हिनामिना गरेपछि सञ्चालक पौडेल र कर्मचारी किरण यसअघि सहकारी बन्द गरेर भारत भागेका थिए ।

गण्डकी प्रदेश अन्तर्गतको सहकारी रजिष्ट्रारको कार्यालय पोखरामा पुगेर छलफलपछि उजुरी लेख्दैं मित्र मिलन सहकारीका बचतकर्ताहरु ।

भारत भाग्नु अघि अध्यक्ष पौडेलले लेखेको पत्रमा सहकारीको रकम हिनामिना गर्ने सबैको नाम उल्लेख गरेका छन् । अब प्रहरीले थाल्ने अनुसन्धानमा सहकारीको रकम अपचलन गर्ने सम्पूर्ण गिरोहका मतियारहरु पक्राउ हुने आशा बचतकर्ताहरुले लिएका छन् । यो सहकारीका अध्यक्ष रमण पौडेलको परिवारको नाममा रहेका जग्गाहरु पोखरा महानगरपालिका वडा नं. २१ का वडाध्यक्ष दिपकप्रसाद सुवेदीले सेटिङमा आफ्नो नाममा पास गरेका छन् । सोही वडाका इञ्चार्ज गिरीसहितको मिलेमतोमा वडाध्यक्ष सुवेदीले डुब्दैं गरेको सहकारीका सञ्चालकहरुका श्रीमतीका नाममा रहेका जमिनहरु आफ्नो नाममा सेटिङ मिलाउँदैं पास गरेका हुन् ।

सहकारीमा ऋण लिएवापत धितो राखिएको जमिन पनि सुवेदीले कब्जा गरेका छन् । शान्ति केसीको नाममा रहेको जमिन कब्जा गरेपछि यो विवाद सार्वजनिक रुपमा सञ्चारमाध्यममा पनि आएको थियो । जसको खुलासा सप्रमाण डन न्यूजले यस अघि नै गरिसकेको छ । प्रहरी प्रशासनले बचतकर्ताको लगानी डुबाउने सञ्चालकमात्र नभई, उनीहरुको सेटिङमा सम्पत्ति जोगाउन आफ्नो नाममा पास गर्ने वडाध्यक्ष सुवेदी जस्ता पात्रलाई पनि कारवाहीको दायरामा ल्याउनु पर्दछ ।