News Portal

ताजा शिर्षकहरु

प्रमुख समाचार स्वास्थ्य

मुस्ताङमा अस्पताल स्थापनाको ४८ वर्षपछि पहिलो शल्यक्रिया

तस्विर: जिल्ला अस्पताल मुस्ताङ

मुस्ताङ, १ भदौं । मुस्ताङ जिल्लामा अस्पताल स्थापना भएको ४८ बर्षपछि बुधबार पहिलोपटक प्रसूतिको सफल शल्यक्रिया भएको छ । मुस्ताङ जिल्ला अस्पतालको इतिहासमैं पहिलोपटक शल्यक्रिया भएको अस्पतालका निमित्त मेडिकल सुपरिन्टेन्डेन्ट डा. विशाल तिवारीले बताए ।
‘दुई महिना लगाएर उपकरण सेटअप गरियो‚’ डा. तिवारीले भने, ‘त्यसैका परिणाम बुधबार प्रसूति शल्यक्रिया गर्न सफल भयौं ।’ उनले यो सेवालाई निरन्तरता दिइने बताए ।

३ महिना अघि प्रसूति शल्यक्रिया सम्बन्धी उपकरण प्राप्त भएसँग दुई महिना लगाएर सम्पूर्ण उपकरण सेटअप गरिएको र सबै व्यवस्थापन मिलेपछि बुधबार प्रसूति शल्यक्रिया गर्न सफल भएको अस्पतालका मेसु डा.तिवारीले जानकारी दिए । भौगोलिक हिसाबले विकट मानिएका जिल्लामध्येमा पर्ने मुस्ताङमा सामान्य प्रसूति अप्रेशन हुने भएपछि पोखरा वा काठमाडौं लैजानु पर्ने बाध्यता पनि हटेको छ ।

डा. तिवारीका अनुसार अबदेखि अस्पतालमा हाडजोर्नी, एपेन्डिसाइटिस, हाइड्रोसिल, ठूला घाउ चिरफारलगायत सामान्य खालका सबै शल्यक्रिया सेवा उपलब्ध हुनेछ । संघ र प्रदेश सरकारबाट आवश्यक सहयोगको निरन्तरता भएमा मुस्ताङका जनताले अब यस्ता विषयहरुमा सास्ती भोग्न नपर्ने उनको भनाई छ ।

बुधबार बिहान ६ बजेर ३६ मिनेटको जाँदा मुस्ताङको थासाङ गाउँपालिका–३ लेते कालोपानीकी २४ वर्षीया अनिता परियारको शल्यक्रियामार्फत सुत्केरी गराइएको थियो । अनिताले दुई किलो आठसय ग्रामको बच्चा (छोरा) जन्माएकी थिईन् । यतिबेला आमा र शिशुको स्वास्थ्य अवस्था सामान्य रहेको अस्पतालले जानकारी दिएको छ ।

अस्पतालका निमित्त मेडिकल सुपरिन्टेन्डेन्ट डा. तिवारीका अनुसार डाक्टर कुन्दन कर्ण (एमडीजीपी)को नेतृत्वमा डा. तिवारी, राजीव सापकोटा, नर्सद्वय सुनीता श्रीमल र नीता घर्तिमगर र सहयोगी सनिलाल परियारको टिमले सफल शल्यक्रिया गरेको हो ।

तिवारी ६ महिनाअघिमात्रै स्थायी नियुक्ति लिएर अस्पताल गएका थिए । संघीय सरकारबाट केही रकम ल्याएर शल्यक्रियाका लागि आवश्यक उपकरण जडान गरिएको अस्पतालले जनाएको छ । ‘दुई महिना लगाएर उपकरण सेटअप गरियो‚’ डा. तिवारीले भने, ‘त्यसैका परिणाम बुधबार प्रसूति शल्यक्रिया गर्न सफल भयौं ।’ उनले यो सेवालाई निरन्तरता दिइने बताए ।