नयाँदिल्ली, १९ चैत । नेपाल–भारतबीचको सीमा विवादको विषय समाधानका लागि प्रधानमन्त्री शेरबहादुर देउवाले भारतका प्रधानमन्त्री नरेन्द्र मोदीसँग छलफल शुरु गरेका छन् । नेपाली भूमि अतिक्रमण गर्ने क्रम नरोकिएपछि उठेको विवादले दुईइ देशबीचको कूटनीतिक सम्बन्ध चिसिएको थियो ।

पछिल्लो समय नेपालले लिपुलेक, कालापानी र लिम्पियाधुरा समावेश गरेको नयाँ चुच्चे नक्सा सार्वजनिक गरेसँगै भारत नेपालसँग रुष्ट थियो । जब कि भारतले नेपाली भूमि लिपुलेक, कालापानी र लिम्पियाधुरा हुँदै तिब्बतको मानसरोवर जाने सडक निर्माण कार्यलाई झनै तिव्रता दिएपछि विवाद चर्किएको थियो ।

प्रधानमन्त्री देउवाले नेपाल–भारतबीचको सीमा विषयलाई स्थापित द्विपक्षीय संयन्त्रमार्फत समाधान गर्न आफूले समकक्षी नरेन्द्र मोदीलाई भनेको जानकारी गराएका छन् । हैदराबाद हाउसमा आज शनिबार भएको द्विपक्षीय भेटवार्तापछि भएको पत्रकार सम्मेलनमा प्रधानमन्त्री देउवाले भने,‘हामी (देउवा र मोदी) ले सीमा विषयका बारेमा छलफल ग¥यौं । र, मैले मोदीजीलाई यो विषय द्विपक्षीय संयन्त्रमार्फत समाधान गर्नका लागि आग्रह गरेका छौँ ।’

नेपाल र भारतबीच पछिल्लो समय सीमा विवादका कारणले गर्दा समस्या भइरहेको छ । दुई मुलुकबीच सीमा समस्या समाधानको लागि पटक–पटक पहल भए पनि अघि बढ्न सकेको छैन । सन् २०१४ मा मोदीकै नेपाल भ्रमणका दौरानमा सबैभन्दा बढी विवादमा रहेको कालापानी क्षेत्र र सुस्ता क्षेत्रका लागि वार्ता गर्नको लागि परराष्ट्र सचिवस्तरीय संयन्त्र बनेको थियो । जसको अहिलेसम्म बैठक बस्न सकेको छैन ।