मिलेनियम च्यालेन्ज एकाउन्ट विकास समिति (एमसीए नेपाल) ले अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) कम्प्याक्ट सम्बन्धी गोप्य वा लुकाइएको दस्तावेज नभएको जनाएको छ। 

काठमाडौं, १९ माघ । एमसीसी विरोधीहरूले भ्रम फैलाएको भन्दै एमसीए नेपालले मंगलबार विज्ञप्ति मार्फत यस्तो धारणा सार्वजनिक गरेको हो। “एमसीए नेपाल हदैसम्म पारदर्शिता अपनाउने संस्था हो र यस संस्थाले सार्वजनिक महत्त्वका सम्पूर्ण दस्तावेजहरू आफ्ना वेबसाइट तथा अन्य माध्यमबाट सर्वसाधारणको जानकारीका लागि सार्वजनिक गर्दै आएको छ,” एमसीए नेपालले भनेको छ, “…यस सम्बन्धी कुनै पनि दस्तावेज गोप्य राखिनु वा लुकाउनु एमसीए नेपालको पारदर्शिताको विपरीत हुन्छ।”

एमसीसी अन्तर्गत विद्युत् प्रसारण लाइन निर्माण र सडक स्तरोन्नतिका लागि अमेरिकाले नेपाललाई ५० करोड डलर अनुदान दिन लागेको छ।