भारतीय टेलिभिजनको सर्वाधिक सफल शो ‘रामायण’मा लंकाधिपति रावणको भूमिका निभाएका अभिनेता अरविन्द त्रिवेदीको मंगलबार हृदयघातका कारण निधन भएको छ । उनी ८३ वर्षका थिए । उनका भतिज कौस्तुभ त्रिवेदीले अभिनेताको निधनको पुष्टि गरेका छन् ।

कौस्तुभका अनुसार अरविन्दको मंगलबार राती १० बजे निधन भएको हो । पछिल्लो दुई तीन दिनयता उनको स्वास्थ्य अवस्था खराब थियो । यद्यपि उनलाई कुनै रोग भने थिएन । उनलाई हृदयघात भएपछि शरीरका विभिन्न अंगले काम गर्न छोडेको थियो ।

अरविन्दको निधनपछि ‘रामायण’मा उनीसँग काम गरेका अरुण गोविल, सुनील लहरी, दीपिका चिखलिया र फ्यानहरुले उनीप्रति सामाजिक सञ्जालमार्फत श्रद्धाञ्जली व्यक्त गरेका छन् । प्रधानमन्त्री नरेन्द्र मोदीले पनि उनको निधनमा शोक व्यक्त गरेका छन् ।

रामानन्द सागरको ‘रामायण’मा अरुण गोविलले राम, सुनील लहरीले लक्ष्मण र दीपिका चिखलियाले सीताको भूमिका निर्वाह गरेका थिए । ‘आध्यात्मिक रुपमा रामावतारका कारण र सांसारिक रुपले एक धार्मिक, सरल स्वभावका व्यक्ति र मेरो प्रिय मित्र अरविन्द त्रिवेदीजीलाई आज मानव समाजले गुमाएको छ । निश्चय नै उहाँ सिधै परमधाम जानुहुनेछ र भगवान श्रीरामको सानिध्य पाउनुहुनेछ’, अरुणले लेखेका छन् ।