पोखरा । गण्डकी प्रदेशका दुई विना विभागीय मन्त्रीहरुले शुरुमा अस्विकार गरेकै मन्त्रालयको जिम्मेवारी एक महिनापछि सम्हाल्ने भएका छन् । गण्डकी प्रदेशका मुख्यमन्त्री कृष्णचन्द्र नेपाली पोखरेलले आज हुन लागेको बजेटमाथिको छलफल कार्यक्रम अघि नै विवादित मन्त्रालयको विषयलाई टुङ्गो लगाई दिएका हुन् ।

जनता समाजवादी पार्टीका हरिशरण आचार्यले उर्जा, जलस्रोत तथा सिँचाई र स्वतन्त्र सांसद मनाङेले युवा तथा खेलकुद मन्त्रालयको जिम्मेवारी आज आइतबारबाट सम्हाल्ने भएका छन् । यस अघि जसपाका आचार्यले अर्थ मन्त्रालय दावी गर्दै आफ्ना दुवै सांसदलाई मन्त्री बनाउनु पर्ने माग गरिरहेका थिए । साथै दीपक मनाङेले भौतिक पूर्वाधार मन्त्रालयमा अडान राख्दै आएका थिए ।

यता, बजेटमाथिको छलफल सकेर पारित भएपछि मन्त्रिपरिषद्को विस्तार हुने मुख्यमन्त्री पोखरेलले बताएका छन् । तर जसपा र स्वतन्त्र सांसदको विवाद टुङ्गिए पनि प्रमुख मन्त्रालयको दावी कांग्रेस र माओवादीले गरिरहँदा सत्ता पक्ष बिचको किचलो अझै कायमै छ ।

अर्थ र भौतिक मन्त्रालय मध्ये एउटा चाहिने अडान माओवादीले लिईरहेको छ । यता, सरकार सञ्चालन गर्नका लागि कांग्रेस अर्थ मन्त्रालय आफैंसँग राख्न चाहन्छ । मन्त्रालयको विवाद कायमै रहँदा माओवादी भित्र भने कसलाई मन्त्री बनाउने भन्ने विषय पेचिलो बन्दै गईरहेको छ । मन्त्रालय र मन्त्री कसलाई बनाउने भन्ने विषयको टुङ्गो प्रदेशले लगाउन नसकेपछि यसको जिम्मा केन्द्रलाई सुम्पिएको छ ।