पोखरा । गण्डकी प्रदेशका मुख्यमन्त्री कृष्णचन्द्र नेपाली पोखरेलले विश्वासको मत पाएका छन् । आज प्रदेश सभामा बहुमतका साथ ३१ सांसदले विश्वासको मत दिएको सभामुख नेत्रनाथ अधिकारीले घोषणा गरेका छन् ।

५९ सांसद रहेको गण्डकी प्रदेशमा ५८ सांसदले मतदान गरेका थिए । जसमा मुख्यमन्त्री पोखरेलको पक्षमा ३१ र विपक्षमा २७ मत प्राप्त भएको थियो । ५९ सांसद मध्ये १ जना सभामुखले भने मत राख्न पाउँदैनन् ।

नेपाली कांग्रेस संसदीय दलका नेता पोखरेल माओवादी केन्द्र, राष्ट्रिय जनमोर्चा, जनता समाजवादी पार्टी र स्वतन्त्र सांसद दीपक मनाङेको समर्थनमा संविधानको धारा १६८ (५) अनुसार जेठ २९ गते मुख्यमन्त्री नियुक्त भएका थिए ।

६० सदस्यीय गण्डकी प्रदेश सभामा राष्ट्रिय जनमोर्चाका सांसद कृष्ण थापालाई आफ्नै दलले निष्कासन गर्दै पदमुक्त गरेपछि सांसद संख्या ५९ भएको हो । ५९ सदस्यीय प्रदेशसभामा विश्वासको मत पाउन ३० मत आवश्यक पर्दछ । प्रदेशसभामा विपक्षी दल एमालेको २७, नेपाली कांग्रेसको १५, माओवादी केन्द्रको सभामुखसहित १२, राष्ट्रिय जनमोर्चाको २, जनता समाजवादी पार्टीको २ सांसद छन् भने एक जना स्वतन्त्र सांसद छन् ।

मुख्यमन्त्री पोखरेलले जेठ २९ गते पदभार ग्रहण गरेसँगै पाँच सदस्यीय मन्त्रिमण्डल गठन गरेका थिए । जसमा कांग्रेसका तर्फबाट कुमार खड्का, माओवादीका मधुमाया अधिकारी गुरुङ, जनता समाजवादी पार्टीका हरिशरण आचार्य र स्वतन्त्र सांसद राजीव गुरुङ उर्फ दीपक मनाङे मन्त्री भएका थिए ।

विश्वासको मत प्राप्त नहुँदासम्म कुनै पनि मन्त्रीलाई विभागको जिम्मा दिइएको थिएन भने बाँकी मन्त्रालय पनि बाँडफाँड गरिएको थिएन । विश्वासको मत प्राप्त भएसँगै गण्डकी प्रदेश सरकारले अब बाँकी मन्त्रिमण्डल विस्तार गर्नेछ । गण्डकी प्रदेशमा ११ वटा मन्त्रालय रहेका छन् ।