पोखरा । गण्डकी प्रदेशका निवर्तमान मुख्यमन्त्री पृथ्वीसुव्वा गुरुङले सरकार ढाल्न महत्वपूर्ण भूमिका खेलेका राजीव गुरुङ ‘दीपक मनाङे’ले धोका दिएको भन्दै आक्रोश व्यक्त गरेका छन् । गुरुङले आफूले त्यतिबेला चाहेको भए मनाङेको सांसद पद जाने भएपनि त्यस्तो नगरेको बताए ।

आइतबार आफ्नै निवासमा पत्रकारसँग कुरा गर्दै नेकपा एमाले संसदीय दलका नेता गुरुङले मनाङेलाई आफूले चुनाव जिताएको, प्रदेशसभा सदस्यको सपथ दिलाउन भूमिका खेलेको बताए । गुरुङले भने–‘सबै छोड्छु, राजनीति र समाजसेवा गर्छु, सुध्रिन्छु भनेपछि मैले नै सघाएको हो । तर, सबै डाँकूहरु वाल्मिकी नहुँदा रहेछन् ।’

एमालेको समर्थनमा चुनाव जितेका सांसद दीपक मनाङेलाई दुई दुई पटक मन्त्री बनाएका निवर्तमान मुख्यमन्त्री गुरुङले आफूलाई यो भन्दा ठूलो धोका अरु केही नहुने बताएका छन् । रुपान्तरण हुने अवसर हो भन्ने ग्रहण नगरेकाहरुले धोका दिने भन्दै गुरुङले भने–‘धतुरोको बोट आँगनमा रोपेर अमृत फल्दैन भनेको यही हो ।’