पोखरा । अखिल क्रान्तिकारी जिल्ला समिति कास्कीले कम्युनिष्ट विद्यार्थी अभियानको आरम्भ गरेको छ । ‘सम्पूर्ण वामपन्थी, प्रगतिशिल, देशभक्त, जनतान्त्रिक विद्यार्थीहरु एक हौं’ भन्ने मूल नारासहित अखिल क्रान्तिकारी कास्कीले जनप्रिय बहुमुखी क्याम्पसबाट अभियान शुरु गरेको हो ।

अभियानका क्रममा जनयुद्धका सहिद योद्धा शेखर सापकोटाको स्मृतिमा अखिल क्रान्तिकारी कास्कीले सभाको आयोजना गरेको थियो । सो कार्यक्रमका प्रमुख अतिथि तथा नेपाल कम्युनिष्ट पार्टी कास्कीका जिल्ला सेक्रेटरी विश्वासले सहिद सापकोटाको त्याग र बलिदानको उच्च सम्मान गर्दै उहाँहरुले देखेको सपना पुरा गर्न अर्को सहिद बन्न तयार रहेको बताए ।

कास्की सेक्रेटरी विश्वासले कम्युनिष्ट विद्यार्थी अभियानको सफलताको कामना गर्दै यो अभियानले विद्यार्थीको राजनीतिक चेत खुलाउने र तार्किक रुपमा शिक्षा क्षेत्र र कम्युनिष्ट आन्दोलनका बारेमा बहस गर्न सक्ने दक्ष जनशक्ति उत्पादन हुने विश्वास व्यक्त गरे ।

अखिल क्रान्तिकारीका केन्द्रिय सदस्य एवम् गण्डक ब्युरो संयोजक अटलले अभियानको सार बिषय ‘परिवर्तन’ र ‘क्रान्ति’ नै रहेको खुलासा गरे । केन्द्रीय सदस्य अटलले भने–‘अहिलेको शिक्षा नीतिले विद्यार्थीहरुको भविष्य नै अन्यौंलमा रहेको छ । त्यसैले वैज्ञानिक समाजवादी व्यवस्था र व्यवहारिक शिक्षा ल्याउने यो अभियानमा तपाईहरुको योगदान र त्याग कोसेढुङ्गा सावित हुनेछ ।’

अखिल क्रान्तिकारी केन्द्रीय सदस्य एवम् सहिद पुत्र प्रकाश बास्तोला ‘मार्शल’ले शैक्षिक क्षेत्रमा देखिएको वेथितिको अन्त्यका लागि निजी क्षेत्रका नाममा लादिएको दलालीकरण, माफियागिरी र मनोपलीलाई तोड्न एकीकृत जनक्रान्तिको अभियानमा विद्यार्थीहरु संगठित हुँदै जानुपर्नेमा जोड दिए ।

अखिल क्रान्तिकारी कास्कीका अध्यक्ष पुरन पुनले शिक्षा क्षेत्रमा देखिएको विकृति र विद्यार्थीमाथि हुने ज्यादतीपूर्ण कार्यहरुका विरुद्धमा संगठनले पटक–पटक खबरदारी गर्दै आईरहेको भन्दै अभियानमा जुट्न सबैलाई आह्वान गरे ।
कार्यक्रममा अखिल क्रान्तिकारी कास्की जिल्ला उपाध्यक्ष कमला र सचिव युवराज थापाले यो अभियानले विद्यार्थीलाई राजनीति बुझ्न सहयोग पु¥याउने र शिक्षा क्षेत्रमा देखिएका विकृतिहरुलाई खबरदारी गर्न सक्षम बनाउने विचार व्यक्त गरे ।