पोखरा, २१ भदौ । पोखरा फोटोग्राफर संघले आफ्नो ४५ औं वार्षिक साधारणसभा तथा २५ औं अधिवेशनको अवसर पारेर पोखराको फोटोग्राफी क्षेत्रको समग्र इतिहास समेटिएको विशेष स्मारिका सार्वजनिक गरेको छ। शनिबार आयोजित समारोहबीच उक्त स्मारिका विमोचन गरिएको हो।

कार्यक्रमका प्रमुख अतिथि एवम् कास्की क्षेत्र नम्बर २ बाट निर्वाचित प्रतिनिधिसभा सदस्य उत्तमप्रसाद पौडेल, संघका अध्यक्ष भक्त तामाङ र स्मारिका प्रकाशन समितिका संयोजक घनश्याम पौडेलले संयुक्त रूपमा स्मारिकाको विमोचन गरेका हुन्। पोखरा फोटोग्राफर संघले हरेक दश वर्षको अन्तरालमा यस्ता विशेष स्मारिका प्रकाशन गर्दै आएको छ। यसअघि २०६० र २०७१ सालमा प्रकाशन भइसकेको यो तेस्रो विशेष स्मारिका हो।

स्मारिका प्रकाशनका लागि संयोजक घनश्याम पौडेलको नेतृत्वमा १५ सदस्यीय प्रकाशन समिति गठन गरिएको थियो। त्यस्तै, सम्पादन मण्डलमा संयोजक पौडेलसँगै नेपाल फोटोग्राफर महासंघका केन्द्रीय उपाध्यक्ष एवं संघका पूर्वअध्यक्ष दुर्गाप्रसाद पौडेल र पत्रकार विजय नेपाल संलग्न रहेका थिए।

स्मारिकाका संयोजक एवं संघका पूर्वअध्यक्ष घनश्याम पौडेलका अनुसार, २०४ पृष्ठको यस स्मारिकामा पोखरामा फोटोग्राफीको सुरुआत, यसको ऐतिहासिक विकासक्रम, महत्व, वर्तमान समयका चुनौती तथा अवसरहरूलाई मिहीन ढङ्गले समेटिएको छ। यसका अतिरिक्त, फोटो खिच्ने प्रविधिगत तरिका, संघको सांगठनिक इतिहास र गतिविधिहरू समेत समावेश गरिएको हुँदा यो दस्तावेज फोटोग्राफी क्षेत्रका लागि अत्यन्तै पठनीय र संग्रहणीय बनेको छ।

वि.सं. २०३९ सालमा स्थापना भएको पोखरा फोटोग्राफर संघ नेपालमै फोटोग्राफरहरूको सबैभन्दा पुरानो संस्थाको रूपमा परिचित छ। यस संस्थाको अग्रसरता र पहलमा नै पछि गण्डकी फोटोग्राफर संघ र नेपाल फोटोग्राफर महासंघको समेत स्थापना भएको इतिहास छ। हाल करिब ३०० साधारण सदस्य रहेको यस संघमा २५ औं अधिवेशनसम्म आइपुग्दा १८८ जना सदस्यले आफ्नो सदस्यता नवीकरण गरेको संघकी उपाध्यक्ष नन्दकला पौडेलले जानकारी दिइन्।

साधारणसभा तथा अधिवेशनको सोही अवसरमा संघले आफ्नो पाँचौं संस्करणको ’फोटोग्राफी अवार्ड’ समेत वितरण गरेको छ। फोटोग्राफीको विभिन्न विधामा उत्कृष्ट योगदान पु¥याउने व्यवसायी तथा कलाकारहरूलाई प्रोत्साहन गर्ने उद्देश्यले ९ वटा भिन्न विधामा अवार्ड प्रदान गरिएको संघका अध्यक्ष भक्त तामाङले बताए। यो स्मारिका विमोचन र अवार्ड वितरणले पोखराका फोटोग्राफरहरूको व्यावसायिक दक्षता बढाउनुका साथै यस क्षेत्रको ऐतिहासिक दस्ताबेजीकरणमा महत्त्वपूर्ण योगदान पु¥याउने विश्वास गरिएको छ।