पोखरा, १८ वैशाख । पोखरा महानगरपालिका–१८, खपौदीस्थित फेवातालमा पौडी खेल्ने क्रममा डुबेर एक बालकको ज्यान गएको छ। मृत्यु हुनेमा खपौदी बस्ने १० वर्षीय आरेस लामा रहेका छन्।

शुक्रबार दिउँसो खपौदी क्षेत्रमा बालक तालमा डुबेर बेपत्ता भएको खबर प्राप्त हुनासाथ सशस्त्र प्रहरी बल नेपाल नम्बर २४ गण हेडक्वार्टर कालिका कास्कीबाट तत्काल उद्धार टोली परिचालन गरिएको थियो।

सशस्त्र प्रहरी नायब निरीक्षक ताराचन्द्र शर्माको नेतृत्वमा खटिएको गोताखोरसहितको सात सदस्यीय टोलीले घटनास्थलमा खोजी कार्य सुरु गरेको थियो। लामो प्रयासपछि गोताखोरको टोलीले करिब १८ फिट गहिराइबाट बालकलाई अचेत अवस्थामा फेला पारी तालबाट बाहिर निकालेको थियो।

तालबाट उद्धार गरिएका बालकलाई उपचारका लागि तुरुन्तै पश्चिमाञ्चल क्षेत्रीय अस्पताल पुर्‍याइएको थियो। अस्पतालमा चिकित्सकको टोलीले जाँच गर्दा उनलाई मृत घोषणा गरेको उद्धार कार्यको नेतृत्व गरेका शर्माले जानकारी दिए।