पोखरा, १२ चैत । नेपाल पत्रकार महासंघ कास्की शाखाले आफ्नो ७१ औं स्थापना दिवसको अवसरमा पत्रकारिता क्षेत्रमा योगदान पुर्‍याउने व्यक्तित्व तथा संस्थालाई सम्मान र पुरस्कार प्रदान गर्ने भएको छ ।

चैत १६ गते मनाइने स्थापना दिवसका दिन शाखाले ‘पोखरा पत्रकारिता सम्मान’ र ‘स्व. जगन्नाथ सिग्देल स्मृति पत्रकारिता पुरस्कार’ अर्पण गर्न लागेको हो ।

शाखाले हरेक वर्ष पत्रकारिता क्षेत्रमा उल्लेखनीय योगदान दिने पत्रकार र संस्थालाई आलापालो रूपमा पोखरा पत्रकारिता सम्मान प्रदान गर्दै आएको छ । सम्मान छनोट समितिको सिफारिस अनुसार यस वर्ष २०८१ को सम्मान बरिष्ठ पत्रकार राजबहादुर गुरुङलाई र २०८२ को सम्मान सहारा क्लबलाई प्रदान गरिने भएको छ ।

तीन दशकभन्दा बढी समयदेखि पत्रकारितामा सक्रिय गुरुङ हाल युनाइटेड खबर अनलाइनमा कार्यरत छन् । उक्त सम्मानमा नगद रु. ५० हजार ५ सय ५५ रुपैयाँ, दोसल्ला र सम्मानपत्र प्रदान गरिने छ । सम्मान छनोट समितिमा अग्रज पत्रकार कुसुमकेशव पराजुली, पुण्य पौडेल र गंगाधर पराजुली रहेका छन् ।

यसैगरी, स्व. जगन्नाथ सिग्देल स्मृति पत्रकारिता पुरस्कार २०८१ का लागि पत्रकार फणिन्द्र अधिकारी (अकिञ्चन) र २०८२ का लागि पत्रकार एकराज गिरीलाई प्रदान गरिने भएको छ । नेपाल पत्रकार महासंघ गण्डकी प्रदेशका अध्यक्ष रमेश पौडेलसहित पत्रकार रुद्र श्रीस मगर र भीम थापा रहेको छनोट समितिको सिफारिसमा यो निर्णय भएको हो । पुरस्कार राशि नगद रु. २५ हजार ५ सय ५५ रुपैयाँ र सम्मानपत्र रहेको छ । अधिकारी विगत दुई दशकदेखि पत्रकारितामा क्रियाशील छन् भने हाल उनी गोरखापत्र दैनिकमा कार्यरत छन् । एकराज गिरी दुई दशकदेखि पत्रकारितामा क्रियाशिल छन् । हाल उनी सफल न्यूजमा आवद्ध छन् ।