पोखरा, ४ चैत । पोखरा महानगरपालिका वडा नं. ८ जाल्पारोड क्षेत्रमा रहेका विभिन्न खाजाघरहरूमा अनैतिक तथा अवैध गतिविधि भइरहेको सूचना प्राप्त भएपछि प्रहरीले छापा मारेको छ ।

जिल्ला प्रहरी कार्यालय कास्की र वडा प्रहरी कार्यालय बैदामबाट खटिएको टोलीले आइतबार साँझ करिब ४ः३० बजे उक्त स्थानको अनुसन्धान गर्दा आर्थिक अवस्था कमजोर भएका महिलाहरूलाई ’राम्रो तलबमा होटलको काम लगाइदिन्छु’ भन्दै प्रलोभनमा पारी ल्याइएको पाइएको छ । सुरुमा होटलको काम देखाएर राख्ने र केही समयपछि होटलमा आउने पुरुषहरूबाट पैसा लिएर महिलाहरूलाई जबरजस्ती रात बिताउन तथा अनैतिक कार्य गर्न बाध्य बनाउने गरेको खुलेको छ ।

घटनास्थलबाट प्रहरीले ४ जना महिलाहरूलाई उद्धार गरेको छ । साथै उक्त अपराधमा संलग्न दुई जनालाई पक्राउ गरिएको छ । पक्राउ पर्नेमा भारतको स्थायी घर भई हाल पोखरा महानगरपालिका–१४ चाउथे बस्ने २४ वर्षीय राधे श्याम शाह र बागलुङको काठेखोला गाउँपालिका–४ घर भई हाल पोखरा महानगरपालिका–१ बगर बस्ने २८ वर्षीय खेमु थापा रहेका छन् ।

उनीहरूमाथि मानव बेचबिखन तथा ओसारपसार (ट्राफिकिङ) सम्बन्धी कसूरमा कास्की जिल्ला अदालतबाट ७ दिनको म्याद थप गरी थप अनुसन्धान अगाडि बढाइएको जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक हरि बहादुर बस्नेतले जानकारी दिएका छन् । प्रहरीले पीडित महिलाहरूको उद्धारपछि आवश्यक कानुनी तथा मनोसामाजिक सहयोगको व्यवस्था मिलाइरहेको जनाएको छ ।