तनहुँ, २३ फागुन । राष्ट्रिय स्वतन्त्र पार्टी (रास्वपा)का उपसभापति डा. स्वर्णिम वाग्ले तनहुँ क्षेत्र नम्बर १ बाट प्रतिनिधिसभा सदस्यमा निर्वाचित भएका छन् ।

उनले निकटतम प्रतिस्पर्धी नेपाली कांग्रेसका गोविन्द भट्टराईलाई २१ हजार ८०९ मतको फराकिलो अन्तरले पराजित गर्दै विजय हासिल गरेका हुन् ।  डा. वाग्लेले कुल ३८ हजार ४० मत प्राप्त गरेका छन् भने भट्टराईले १६ हजार २३१ मत मात्रै पाए ।

यस क्षेत्रमा नेकपा (एमाले) की उम्मेदवार भगवती न्यौपानेले ५ हजार ८३० मत प्राप्त गरिन् । नेपाली कम्युनिस्ट पार्टीका विद्यानाथ ढकालले २ हजार ३९३ मत ल्याएका छन् ।

अन्य उम्मेदवारहरूको मत यस प्रकार रहेको छ:
रामदत्त जोशी (राष्ट्रिय प्रजातन्त्र पार्टी) : ६१४ मत
काशीराम गुरुङ (श्रम संस्कृति पार्टी) : ५२२ मत
मन्जिल राना (उज्यालो नेपाल पार्टी) : १६७ मत
प्रेम बहादुर थापा (मंगोल नेशनल अर्गनाइजेसन) : १० मत

बाँकी स्वतन्त्र तथा साना दलका उम्मेदवारहरूले ५ देखि १ मत मात्रै प्राप्त गरेका छन् भने केहीले शून्य मत पाएका छन् ।

यो निर्वाचन परिणामले तनहुँ–१ मा रास्वपाप्रति मतदाताको निरन्तर समर्थन कायम रहेको देखाएको छ । डा. वाग्लेले यसअघि पनि सोही क्षेत्रबाट उपनिर्वाचन जितेका थिए । मतगणना सम्पन्न भएसँगै निर्वाचन अधिकृतको कार्यालयले उनलाई विजयी घोषणा गरेको छ ।