पोखरा, ९ फागुन । बड्स एकेडेमी पोखराले एसईई २०८१ मा उत्कृष्ट नतिजा हासिल गर्ने विद्यार्थीहरूलाई विशेष सम्मान गरेको छ । विद्यालयले ४.० जिपिए ल्याउने नितु भण्डारी र सुश्मा खत्रीलाई जनही एक लाख रुपैयाँ नगद पुरस्कारसहित सम्मान गरेको हो ।

विद्यालयको प्राङ्गणमा आयोजित अभिभावक दिवस तथा पुरस्कार वितरण समारोहमा यी दुई विद्यार्थीलाई उत्कृष्ट नतिजामार्फत विद्यालयको गरिमा बढाएबापत नगद पुरस्कार, दोसल्ला ओढाई र प्रमाणपत्र प्रदान गरियो । नितु र शुश्मालाई संस्थापक तथा प्राचार्य प्रकाश राज वाग्लेले जनही ७५ हजार रुपैयाँ र विद्यालय व्यवस्थापन समितिका अध्यक्ष मेहरमान श्रेष्ठले जनही २५ हजार रुपैयाँ गरी कुल एक लाख रुपैयाँ हस्तान्तरण गरेका थिए ।

यसैगरी, गत वर्षको एसईईमा ३.७९ जिपिए ल्याउने पूर्णिमा वाग्ले र ३.६१ जिपिए ल्याउने महिमा गुरुङलाई ए प्लस अवार्ड प्रदान गरियो भने अन्य विद्यार्थीहरूलाई पनि विभिन्न विधामा सम्मानित गरियो ।

कार्यक्रममा बोल्दै प्राचार्य प्रकाश राज वाग्लेले नर्सरीदेखि कक्षा १० सम्म यसै विद्यालयमा अध्ययनरत सम्पूर्ण विद्यार्थीहरूले अनुशासन, परिश्रम र निरन्तरताको उदाहरण प्रस्तुत गरेको स्मरण गर्दै आगामी शैक्षिक यात्रामा थप सफलताको शुभकामना व्यक्त गरे ।

उनले भने, ‘विद्यालयले किताबी ज्ञान मात्र होइन, जीवन उपयोगी सीप र आत्मविश्वास पनि प्रदान गर्छ । नितु र शुश्माले हासिल गरेको ४.० जिपिए, पूर्णिमा र महिमाले प्राप्त गरेको ए प्लस तथा अन्य विद्यार्थीहरूको राम्रो नतिजा हाम्रो समग्र शैक्षिक वातावरण, शिक्षकहरूको समर्पण र अभिभावकको सहयोगको परिणाम हो ।’

एनप्याब्सन कास्कीका अध्यक्ष हेमन्त अधिकारीले बड्स एकेडेमीको यो दोहोरो ४.० जिपिएको नतिजा अब कास्की जिल्लामा मात्र सीमित नरही राष्ट्रिय तथा अन्तर्राष्ट्रिय स्तरमा पुगिसकेको बताए । उनले विद्यालयले अभिभावकहरूबाट निरन्तर साथ र सहयोगको अपेक्षा गरेको उल्लेख गरे ।

सम्मानित विद्यार्थी नितु भण्डारी र शुश्मा खत्रीले आफूहरूको यो उपलब्धिको श्रेय विद्यालय परिवारलाई नै दिए । उनीहरूले भने, ‘बड्स एकेडेमीले सही मार्गदर्शन, नियमित अभ्यास र निरन्तर हौसला प्रदान ग¥यो, जसका कारण आज यो सफलता सम्भव भयो ।’

विद्यालय व्यवस्थापन समितिका अध्यक्ष मेहरमान श्रेष्ठले विगतदेखि नै गुणस्तरीय शिक्षा र अतिरिक्त क्रियाकलापमार्फत विद्यार्थीको सर्वाङ्गीण विकासमा जोड दिँदै आएको बताउँदै आगामी दिनमा पनि उत्कृष्ट नतिजा ल्याउने विद्यार्थीलाई प्रोत्साहन जारी राख्ने प्रतिबद्धता जनाए ।

अभिभावकहरूले पनि विद्यालयको शैक्षिक वातावरण, अनुशासन र शिक्षकहरूको लगनशीलताको प्रशंसा गर्दै आफ्ना सन्तानको सफलतामा विद्यालयको भूमिका महत्वपूर्ण रहेको बताएका छन् ।

विद्यालयले हरेक वर्ष उत्कृष्ट नतिजा हासिल गर्ने विद्यार्थीहरूलाई सम्मान गर्दै आएको छ र यसले अन्य विद्यार्थीहरूलाई पनि थप प्रेरणा मिल्ने विश्वास व्यक्त गरेको छ ।