पोखरा, २५ कार्तिक । जेन-जी आन्दोलनको क्रममा प्रहरी कार्यालयबाट लुटिएको हतियारसहित कास्की प्रहरीले एक जना १६ वर्षीय बालकलाई पक्राउ गरेको छ।

जिल्ला प्रहरी कार्यालय कास्कीले आज जारी गरेको प्रेस विज्ञप्तिअनुसार गत भदौ २४ गते जेन-जी आन्दोलनका नाममा देशभर भएका तोडफोड, आगजनी र हतियार लुटपाटका घटनाहरूको अनुसन्धानका क्रममा ठूलो सफलता हात परेको हो।

पक्राउ पर्नेमा पोखरा महानगरपालिका-४ मा डेरा गरी बस्ने १६ वर्षीय बालक (परिवर्तित नाम) २०८२।०८३ कास्की ३१०० रहेका छन्। उनीबाट वडा प्रहरी कार्यालय बगरको आम्दानीमा रहेको चाइनिज पेस्तोल टाइप-५४ (म्यागजिन बिना) बरामद गरिएको प्रहरीले जनाएको छ।

“आन्दोलनका क्रममा लुटिएको उक्त हतियार आज ९कात्तिक २३ गते० पोखरा-४ स्थित डेराबाट बरामद भएको हो,” जिल्ला प्रहरी कार्यालय कास्कीका डीएसपी तथा सूचना अधिकारी प्रहरी नायब उपरीक्षक हरी बहादुर वस्नेतले भने, “निजलाई पक्राउ गरी सम्मानित कास्की जिल्ला अदालतबाट आपराधिक उपद्रव गर्न नहुने मुद्दामा ५ दिनको म्याद थप गरी थप अनुसन्धान अघि बढाइएको छ।”

जेन-जी आन्दोलनका क्रममा कास्कीसहित देशका विभिन्न जिल्लामा प्रहरी चौकी, अदालत र कारागारमा आक्रमण गरी हतियार लुटिएका थिए। प्रहरीले ती सबै घटनामा संलग्न व्यक्तिहरूको खोजी तीव्र पारेको जनाएको छ। यो पक्राउसँगै जेन-जी आन्दोलनका नाममा भएका आपराधिक गतिविधिमा संलग्नहरूमाथि कानुनी कारबाहीको शृङ्खला सुरु भएको प्रहरीको भनाइ छ।