पोखरा, ४ साउन । कास्की कारागारमा चौकीदार नियुक्तिको विवादले स्थिति तनावग्रस्त बनेको छ । आइतबार ब्लक ‘ए’का कैदीबन्दीले पुरानो नाइके प्रविन गुरुङलाई हटाएर अजय गुरुङलाई चौकीदार नियुक्त गरिएको भन्दै विरोध जनाएका छन् ।

नयाँ चौकीदारलाई अमान्य ठहर गर्दै कैदीबन्दीले कारागारभित्र टायर बालेर नाराबाजी गरेका छन् । बाहिर सुरक्षाकर्मीको कडा पहरा छ ।

कारागार प्रमुख राजेन्द्र शर्माले आन्तरिक चौकीदार नियुक्तिको विषयमा सामान्य विरोध भएको स्वीकार गर्दै स्थिति नियन्त्रणमा रहेको र छलफलबाट समाधानको प्रयास भइरहेको बताए ।

कास्की कारागारमा ब्लक ‘ए’ मा ४६६, ब्लक ‘बी’ मा ४८० र महिला ब्लकमा ३५ जना कैदीबन्दी छन् ।