पोखरा, २२ असार। पोखरा–३३ स्थित कालिका माध्यमिक विद्यालय, आँपुभन्ज्याङका सबै १४ जना विद्यार्थी २०८१ सालको एसइई परीक्षामा शतप्रतिशत पास भएका छन्। यो उपलब्धि हासिल गरेबापत विद्यालयले शुक्रवार एक विशेष कार्यक्रम आयोजना गरी विद्यार्थीहरूलाई सम्मान गरेको छ।

कार्यक्रम विद्यालय व्यवस्थापन समितिका अध्यक्ष गङ्गाबहादुर पुनको अध्यक्षतामा सम्पन्न भएको थियो । कार्यक्रममा वडा नं. ३३ का वडा सदस्य प्रकाश कार्की, प्रधानाध्यापक रुपिन्द्र प्रभावी, अध्यक्ष पुनलगायतले विद्यार्थीलाई प्रमाणपत्र र उपहार प्रदान गरी बधाई दिएका छन् ।

वडा सदस्य कार्कीले कालिकाको सफलता सम्पूर्ण वडा–३३ को गर्वको विषय भएको उल्लेख गर्दै भने, “सफलताले जीवनको ढोका खोल्छ, तर अनुशासनले त्यो मार्गमा हिँड्न मद्दत गर्छ।” उनले विद्यार्थीलाई निरन्तर मिहिनेत, विनम्रता र कृतज्ञता बोकेर अघि बढ्न सुझाव दिए।

विद्यालय, शिक्षक र अभिभावकको योगदानको कदर
विव्यस अध्यक्ष पुनले “विद्यार्थीको हितमा निरन्तर लागिरहेका छौं, र त्यसको फल आजको उपलब्धिमा देखिएको छ,” भन्दै शिक्षक र अभिभावकको समर्पणको प्रशंसा गरे।

प्रधानाध्यापक रुपिन्द्र प्रभावीले विद्यालयले शिक्षा मात्र नभई विद्यार्थीको बहुआयामिक विकासका लागि प्रयासरत रहेको बताए। “पाठ्यक्रमसँगै अन्तर्निहित प्रतिभा उजागर गर्ने हाम्रो योजनाको नतिजा हो यो सफलता,” उनले भने।

विद्यार्थीको अनुभव : ऊर्जा र प्रविधिको मिश्रण
विद्यार्थी प्रमिसा बानियाले विद्यालयबाट प्राप्त सकारात्मक ऊर्जाकै कारण आफूहरू सफल भएको बताइन्। अर्का विद्यार्थी सङ्गम श्रेष्ठले शिक्षकको मार्गदर्शन र प्रविधि प्रयोगमार्फतको आत्मपठनले उच्च अंक ल्याउन सहयोग गरेको सुनाए।

सो अवसरमा कक्षा १० मा अध्यापन गराउने शिक्षकहरूलाई समेत सम्मान गरिएको थियो। कार्यक्रमको सञ्चालन सहायक प्रधानाध्यापक बालकुमारी थापा मगरले गरेकी थिइन्।

शिक्षक अभिभावक संघका सदस्य बेलबहादुर केसी, शिक्षक नारायणप्रसाद चापागाईं, पूर्व सहायक प्रधानाध्यापक गोपीराज अधिकारीलगायतले शुभकामना मन्तव्य दिएका थिए।