पोखरा, ३० कार्तिक । निर्वाचन आयोगको कार्यालय कास्कीमा उम्मेदवार रामजी बराल ‘जीवन’ विरुद्ध दिइएको उजुरी गलत सावित भएको छ । कास्की क्षेत्र नं. ३ का प्रतिनिधिसभा सदस्यका ५ दलीय गठबन्धनका साझा उम्मेदवार बराल विरुद्ध बुधबार उजुरी परेको थियो ।

युवा तथा खेलकुद मन्त्रालय अन्तर्गतको युवा तथा साना व्यवसायी स्वरोजगार कोष सचिवालयले आज निर्वाचन कार्यालय कास्कीलाई पत्राचार गर्दै कास्की क्षेत्र नं. ३ का प्रतिनिधिसभा सदस्यका उम्मेदवार रामजी बराल कालो सूचिमा नरहेको स्पष्ट पारेको छ ।

गण्डकी माछापुच्छ्रे सञ्चार संस्था लिमिटेड र यस कोष बिच मिति २०६९ चैत १२ गतेमा थोक कर्जा सम्झौंता भई ५० लाख रुपैयाँ कर्जा लिएको र उक्त संस्थाले २०७९ जेठ ६ गतेमा सम्पूर्ण कर्जा चुक्ता गरेको कोषका कार्यकारी निर्देशक विश्वमोहन अधिकारीले उल्लेख गरेका छन् ।

पत्रमा उक्त संस्था तथा संस्थासँग सम्बन्धित रामजी प्रसाद बराल ‘जीवन’ लगायत सञ्चालक समिति, लेखा समिति तथा ऋण उपसमितिका पदाधिकारी एवं सदस्यहरु यस कोषलाई तिर्न बुझाउनु पर्ने दायित्वबाट मुक्त भएको व्यहोरासमेत पत्रमा उल्लेख छ ।

प्रतिनिधि सभा कास्की क्षेत्र नम्बर ३ का एमालेका उम्मेदवार दामोदर बैरागी र उनका कार्यकर्ताहरुले गठबन्धनका साझा उम्मेदवार रामजी बराल ‘जीवन’ विरुद्ध अनर्गल प्रचारमा उत्रिएको आरोप लागेको छ ।