काठमाडौं । महोत्तरीको मटिहानी नगरपालिका ५ का वडाध्यक्ष रामबहादुर महतोसहित दुईजनाविरुद्ध विशेष अदालतमा मुद्दा दायर भएको छ ।

अख्तियार दुरुपयोग अनुसन्धान आयोगले वडाध्यक्ष महतो र सहायक कम्प्युटर अपरेटर (करार) अ‍ैबुल राईनविरुद्ध भ्रष्टाचार आरोपमा मुद्दा चलाएको अख्तियारका प्रवक्ता नारायण प्रसाद रिसालले जानकारी दिए।

वडाध्यक्ष महतो र राईनले जन्म दर्ताको सिफारिस गरिदिएवापत सेवाग्राहीसँग घुस लिएको अख्तियारले जनाएको छ। उनीहरुलाई अख्तियारको टोलीले सेवाग्राहीबाट १० हजार घुस लिइसकेको अवस्थामा असोज २४ गते नियन्त्रणमा लिइएको थियो ।

अनुसन्धानमा रकम मोलमोलाइ गरी आफ्नो पद, ओहोदा र अधिकारको दुरुपयोग गरी भ्रष्टाचार गर्ने बदनीयतपूर्ण मनसाय राखी घुस लिएको प्रमाण पुष्टि भएको आरोप पत्रमा उल्लेख छ ।

उनीहरुविरुद्ध भ्रष्टाचार निवारण ऐन बमोजिम सजाय हुन मागदावीसहित विशेष अदालत काठमाडौंमा आरोपपत्र दायर गरिएको अख्तियारले जनाएको छ।