लन्डन । ‘हाम्रो संस्कृति, हाम्रो पहिचान, हाम्रो गौरव’ भन्ने मूल नाराका साथ तमुधिं यूकेले सञ्चालन गर्न लागेको ‘नेपाली मेला’को तयारी अन्तिम चरणमा पुगेको छ । बेलायतकै सबैभन्दा वृहत फुटबल प्रतियोगिता ‘गोर्खा कप’ सकिएको महिना दिन भित्रैं केम्पटन पार्क रेस कोर्समा मेला हुने भएको हो ।

कोरोना महामारीका कारण गत वर्ष स्थगित भएको यो मेला यसपटक १२ औं संस्करणमा लन्डनस्थित नेपाली दुतावासको सहकार्यमा सञ्चालन हुन लागेको हो । यस अघि तमुधिं यूकेका तर्फबाट मिचेटमा पत्रकार सम्मेलनको आयोजना गर्दै वरिष्ठ उपाध्यक्ष एवं मेला संयोजक हरि गुरुङले यसको तयारीका बारेमा जानकारी दिएका थिए ।

वरिष्ठ उपाध्यक्ष गुरुङका अनुसार यो मेला सम्पन्न गर्नका लागि अनुमानित ३० हजार पाउण्ड खर्च हुने र यसमा १९ विभिन्न संघसंस्थाहरुले भाग लिनेछन् । मेलामा ती संस्थाहरुले नेपाली कला, संस्कृति, परम्परा, रहनसहन र भेषभूषा झल्काउने विभिन्न झाँकी र नृत्यहरु प्रस्तुत गर्नेछन् ।

सो मेलामा विगतमा आठदेखि १० हजारसम्म दर्शकहरुको सहभागिता रहने गर्दथ्यो । यसपटक करिब तीनहजार दर्शकको सहभागिता रहने आँकलन आयोजक संस्थाले गर्नुका साथै मेलामा बेलायत सरकारले कोरोना सम्बन्धि स्वास्थ्य मापदण्ड र अन्य नियमहरु हटाए पनि इच्छुक आगन्तुकलाई मास्क र स्यानिटाइजरको उपलब्ध गराईने भएको छ ।

२९ अगस्टको दिउँसो १ बजे झाँकीसहित विभिन्न प्रस्तुतीका साथ शुरु हुने यस मेलाका उद्घाटन राजदूत लोकदर्शन रेग्मीले मेलाको गर्ने कार्यक्रम रहेको छ । कोरोना महामारीका कारण विगतमा जस्तो अन्य देशका कूटनीतिज्ञहरु यसपटक भने उल्लेख्य मात्रामा हुँदैनन् कि भन्ने चिन्ता आयोजक संस्थाले व्यक्त गरेको छ ।

‘कुटनीतिज्ञहरुलाई निमन्त्रणा गर्ने जिम्मा दूतावासलाई दिइएको हो । समय अभाव, कोभिड र दूतावासमा सबै नयाँ टिम भएका कारण धेरै डिप्लोम्याट्स नहुन सक्छन्’, संयोजक गुरुङले भने, ‘तर, विदेशीहरु र स्थानीय काउन्सिल नेताहरु दर्शकका रुपमा रहने अपेक्षा छ ।’

मेलामा खाना, च्यारिटी, हस्तकला लगायतका २७ व्यापारिक स्टल रहनेछन् । विभिन्न सांस्कृतिक प्रस्तुति र दर्शकले काटेको टिकटबाटै राफल ड्र पनि सञ्चालन गरिनेछ । राफल ड्रमा प्रथम हुनेलाई एक तोला सुन, द्वितीयलाई ट्याबलेट र तृतीयलाई एक सय पाउन्ड नगद दिइने तमुधिं युकेले जनाएको छ । बिहान १० देखि साँझ ८ बजेसम्म हुने मेलामा सहभागी भएर नेपाली मौलिकपनको स्वाद लिन अध्यक्ष हितकाजी गुरुङले अपिल गरेका छन् ।

‘नेपाली मेला तमुधिं यूकेको मात्र नभई समस्त बेलायतवासी नेपालीको हो । यो मुनाफा कमाउने उद्देश्यले गर्न लागिएको होइन,’ अध्यक्ष गुरुङले भने,’ विदेशमा पनि नेपाली कला, संस्कृति, रीतिरिवाज, भेषभूषा, धर्म संरक्षण र प्रवर्द्धन हाम्रो मुख्य उद्देश्य हो।’

आयोजकका अनुसार मेलामा झाँकी र नृत्य दुवैमा प्रथम हुने समूहलाई १ हजार १ सय पाउन्डसहित एम्बासडर कप प्रदान गरिनेछ । प्रथम हुनेलाई ३ सय पाउन्डको एनआरएनए यूके कपसमेत दिइनेछ । दोस्रो हुनेलाई ७ सय पाउन्ड एवं तेस्रो हुनेलाई ५ सय पाउन्ड नगद प्रदान गरिनेछ ।

त्यसैगरी झाँकीमा मात्र प्रथम हुनेलाई ५ सय पाउन्ड र दोस्रो हुनेलाई ३ सय दिइनेछ । नृत्यमा प्रथम हुनेलाई ५ सय पाउन्ड र दोस्रो विजेतालाई ३ सय पाउन्ड प्रदान गरिनेछ । मेलाका लागि दूतावासबाट २५ सय पाउन्ड सहयोग प्राप्त भएको तमुधिं यूकेले जनाएको छ । झाँकी निर्णायकमा नेपाली कला–संस्कृतिविद् चार जना र नृत्यको निर्णायकमा तीनजना रहनेछन् ।

मेलाका लागि दूतावासबाट २५ सय पाउण्ड सहयोग प्राप्त भएको तमुधिं यूकेले जनाएको छ । झाँकी निर्णायकमा नेपाली कला, संस्कृतिविद ४ जना र नृत्यको निर्णायकमा ३ जना बेग्लै व्यक्ति रहने आयोजकले जनाएका छन् ।

महासचिव परशु गुरुङले सञ्चालन गरेको उक्त कार्यक्रममा आमा समूहकी महासचिव यशोदा गुरुङले आफ्नो तयारीबारे जानकारी दिइन् । सो अवसरमा तमुधिं यूकेका मिडिया सेक्रेटरी एस के गुरुङले उपस्थित मिडियाकर्मीहरुको परिचय गराएका थिए भने अध्यक्ष हितकाजी गुरुङले खादा र मेला पास उपलब्ध गराई सम्मान गरेका थिए ।

पत्रकार सम्मेलनमा नेपाल पत्रकार महासंघ बेलायतका अध्यक्ष ध्रुवराज अर्यालसहित शाखाका अधिकांश पदाधिकारी, अन्य पत्रकारहरु, सल्लाहकारहरु र इकाइ अध्यक्ष लगायतको सहभागिता थियो ।