पोखरा । नेपाल कम्युनिष्ट पार्टी कास्कीले जनयुद्धका सहिद विजयराज बास्तोलाको १८ औं स्मृतिसभा सम्पन्न गरेको छ । नेकपा कास्कीले बास्तोलाको योगदान र बलिदानको उच्च सम्मान गर्दै उनकै घरमा पुगेर स्मृति सभा गरेको जनाएको छ ।

जनयुद्धका क्रममा तत्कालिन शाही सेनाले २०६१ असार १६ गते तत्कालिन नेकपा माओवादीका अन्य कार्यकर्ताहरुसहित पक्राउ गरेर यातना दिदैं निर्मम हत्या गरेको थियो । शाही सेनाले सहिद अजितसँगै पक्राउ परेका देवेन्द्र पोखरेल ‘संकल्प’लाई पनि निर्मम हत्या गरेको थियो । सोही दिन कोपिला रानाभाट ‘सुमन’को पनि शाही सेनाले कास्कीको ल्वाङघलेल गाविसमा पक्राउ गरी खाल्डो खन्न लगाएर त्यहीँ खाल्डोमा गोली ठोकी निर्मम हत्या गरेको थियो ।

जनताको मुक्तिका लागि संघर्षरत इमान्दार अनि साहसी नेता बास्तोला लगायतले मर्न तयार भए तर कुनै पनि पार्टीको सूचना शाही सेनालाई दिन मानेनन् र मृत्युवरण गर्न पुगे । उनको हत्याले श्रीमती खिमादेवी, भाइ उदयराज, दिदी पार्वती अधिकारी, छोरा प्रकाश, छोरीहरु पवित्रा र अस्मिताले अभिभावक मात्र होइन, सिङ्गो मुलुकले नै एक होनहार र इमान्दार व्यक्ति गुमाउन पुग्यो ।

बाबु कृष्णविलास बास्तोला र आमा कृष्णकुमारी बास्तोलाको कोखबाट २०२५ भदौं ३१ गते साविक सिद्ध गाविस वडा नं. १, टाकान्जा कास्कीमा सहिद विजयराजको जन्म भएको थियो ।

सहिद अजित जनयुद्धकालमा २०५६ जेठ १ गते देखि पार्टीको पूर्णकालिन कार्यकर्ता भएर संघर्षमा होमिएका थिए । पार्टीको योजनामा पश्चिम रोल्पा, रुकुमसम्म अभियानकर्मीको रुपमा पुगेका उनी तत्कालिन अवस्थामा नेकपा माओवादीको ईलाका पार्टी सदस्य थिए ।

सहिद अजितको तस्विरमा माल्यार्पण गर्दै सहिदपत्नी खिमादेवी बास्तोला ।

बुबाको शाही सेनाले हत्या गरेसँगै क्रान्तिको अविछिन्न यात्रामा सहिदपुत्र प्रकाश निरन्तर अघि बढिरहेका छन् । पटक–पटक प्रहरी हिरासत, यातना र संघर्ष गर्दै अघि बढिरहेका सहिदपुत्र प्रकाश ‘मार्शल’ गण्डकी प्रदेश कैं चर्चित युवा विद्यार्थी नेता हुन् । इमान्दार, साहसी र जुझारु छवि बनाएका मार्शल यतिबेला नेत्रविक्रम चन्द ‘विप्लव’ले नेतृत्व गरिरहेको नेकपामा आवद्ध छन् ।

स्मृतिसभामा नेकपा कास्कीका सेक्रेटरी गोकुल पराजुली, स्याङ्जा इञ्चार्ज सुजन, सहिद पुत्र तथा विद्यार्थी नेता प्रकाश बास्तोला ‘मार्शल’, सहिदपत्नी खिमादेवी र दुई छोरीहरु पवित्रा र अस्मिता एवं पुराना माओवादी नेताको उपस्थिति रहेको थियो ।