पोखरा । अविरल परेको बर्षाको कारण कास्कीमा एकजनाको मृत्यु हुनुका साथै करोडौंको भौतिक सामाग्रीहरुको क्षति भएको छ । कास्की जिल्लामा पहिरोमा पुरिएर माछापुच्छ्रे गाउँपालिका वडा नं. १ की ४८ वर्षीय लिला विकको मृत्यु भएको छ ।

पोखरा वडा नं. ९ स्थित रामघाटमा सेती नदी थुनिँदा त्यहाँ वरपर बस्ने वस्तीहरु जोखिममा रहेका छन् । सेती नदीमा बाढी आउँदा रामघाट नजिकै एक फार्महाउसबाट ४० भन्दा बढि बंगुर बगाएको र ६ वटा मृत अवस्थामा भेटिएको जिल्ला प्रहरी कार्यालय कास्कीका प्रवक्ता सुवास हमालले जानकारी दिए ।

अन्नपुर्ण गाउँपालिका–१० घान्द्रुक स्थित माथिबाट आएको पहिरो र मादी गाउँपालिका–७ मा मादी खोलाको पानीको बहाब बढ्न जाँदा ६ घर परिवार बिस्थापित भएका छन् । त्यस्तै, मादी गाँउपालिका–१ होकु स्थित कपुजे खोला र नौलो खोलाको बहाब बढ्न गई २ वटा भेडी गोठ र अन्दाजी चारसय वटा भेडा बगाएको जिल्ला प्रहरी कार्यालय कास्कीले जानकारी दिएको छ ।

मादी गाउँपालिका वडा नं. १ मा निर्माणाधिन सुपरमादी हाइड्रोपावरमा बाढीले १ अर्ब रूपैयाँ बराबरको क्षति पुगेको अध्यक्ष पुष्पज्योति ढुंगानाले जानकारी दिएका छन् । त्यसतर्फ क्षतिको निरीक्षण गर्न जिल्ला प्रशासन कार्यालय कास्कीका प्रमुख जिल्ला अधिकारी थानेश्वर गौतम र जिल्ला प्रहरी कार्यालय कास्कीका प्रमुख एसपी जीवन श्रेष्ठको टोली त्यहाँ पुगेको छ ।

कास्कीको अन्नपूर्ण गाउँपालिकाका प्रमुख युवराज कुँवरका अनुसार गाउँपालिका कैं वडा नं. ६ को ५०/६० घरपरिवारको वस्ती हाइजुङ गाउँ जोखिममा रहेको छ । त्यहाँ गाउँमाथिबाट पहिरो खस्न थालेको गाउँपालिकाका अध्यक्ष कुँवरले बताए । त्यसैगरी, अन्नपूर्ण गाउँपालिका कैं वडा नं. ७ मा रहेको विरेठाँटीमा हाइड्रो पावरका कारण खोला अव्यस्थित हुँदा नजिकैका वस्तीहरु जोखिममा परेका छन् ।