काठमाडौं । कपिलवस्तुका माओवादी नेता दीपक पाण्डेयको हत्यामा उनकै श्रीमतीको संलग्नता भेटिएको भन्दै प्रहरीले पक्राउ गरेको छ । माओवादी केन्द्रका जिल्ला नेता पाण्डेयलाई आफ्नै श्रीमतीसहितको ११ जनाको टोली मिलेर हत्या गरेको रहस्य खुलेको हो ।

जेठ ५ गते अज्ञात समूहले गोली हानी घाइते भएका पाण्डेको उपचारका क्रममा जेठ १० गते मृत्यु भएको थियो । दीपकलाई गोली हान्ने ओमप्रकाश यादव र मृतक पाण्डेकै श्रीमती महिमाबीचको अनैतिक सम्बन्धका कारण हत्यासम्मको योजना बनेको प्रहरीको २५ दिनको अनुसन्धानबाट खुलेको थियो ।

जिल्ला प्रहरी कार्यालय कपिलवस्तुका एसपी नवराज अधिकारीले भने–‘ओमप्रकाश र महिमाको सम्बन्धका विषयमा दीपकले जानकारी पाएपछि उनको हत्या योजना २/३ वर्ष अघि देखि नै बनेको देखिन्छ ।’ हतियार खरिद गरेर पेशेवर अपराधीलाई हत्याका लागि बैना रकम दिएको र लामो समयपछि उनीहरुको हत्या गर्ने योजना पुरा गरेको एसपी अधिकारीले बताए ।

दीपकले आफ्नी श्रीमतीसँगको अनैतिक सम्बन्धको बारेमा थाहा पाएपछि ओमप्रकाशलाई धम्काएका थिए । दुवै परिवारमा यो कुरा थाहा पाएपछि दीपकलाई खत्तम गरिदिए दुवैलाई सजिलो हुने मनसायले हत्याको योजना बनाएको प्रहरी अनुसन्धानबाट खुलेको छ ।

अनुसन्धानका क्रममा ओमप्रकाश यादवले दीपकको हत्याको योजना बनाएको, हतियार खरिद तथा व्यवस्थापनको काम गरेको र आफ्नै उपस्थितिमा मार्न लगाएको देखिन्छ । माओवादी नेता दीपकमाथि गोली प्रहार भएको दिन उनी पनि सोही समूहसँगै रहेको तथ्य प्रहरीले पत्ता लगाएको छ ।

प्रहरीले ओमप्रकाशको साथबाट एक थान पेस्तोल र ६८ राउण्ड गोली बरामद गरेको छ । प्रहरीले हत्यामा संलग्न चारजना र हतियार व्यवस्थापनमा संलग्न सातजनालाई पक्राउ गरेको छ । एसपी अधिकारीका अनुसार हत्यामा ओमप्रकाश यादव, महिमा पाण्डेय, रमजान साह मुसलान, सकिर अलि पखियाको मुख्य भूमिका देखिएको छ ।

रमजानले भने पाण्डेयलाई मार्नका लागि पटक/पटक ओमप्रकाशबाट एक लाख रुपैयाँ लिएको खुलेको छ । उनले नै पाण्डेयमाथि तीन राउण्ड गोली प्रहार गरेका थिए । एसपी अधिकारीका अनुसार साकिरले पाण्डेयलाई मार्न ओमप्रकाशबाट बैना रकम लिने, मृतकका गतिविधीमा निगरानी राख्ने, घटनामा प्रयोग भएको हतियार पूर्णवीर पाल्पालीको घरमा लुकाएर राख्ने गरेको पाइएको छ ।