काठमाडौँ । जनता समाजवादी पार्टी सरकारमा सामेल भएसँगै मन्त्रिमण्डल हेरफेर भएको छ । । प्रधानमन्त्री केपी शर्मा ओलीले हाल मन्त्रिपरिषदमा रहेका चार मन्त्री बाहेक सबैलाई हटाउँदै छन् । अर्थमन्त्री विष्णुप्रसाद पौडेल, कानून, न्याय तथा संसदीय मामिलामन्त्री लीलानाथ श्रेष्ठ, शिक्षा तथा विज्ञान प्रविधिमन्त्री कृष्णगोपाल श्रेष्ठ र भौतिक पूर्वाधार मन्त्री बसन्त नेम्वाङ बाहेक सबै मन्त्री हट्दैछन् ।

उपप्रधानमन्त्रीमा जसपाका राजेन्द्र महतोसँगै अर्थमन्त्री समेत रहेका विष्णुप्रसाद पौडेल र अर्का एमाले नेता रघुवीर महासेठ पनि उपप्रधानमन्त्री हुने पक्का भएको छ । ’विष्णु पौडेल र रघूवीर महासेठ उपप्रधानमन्त्री बन्दै हुनुहुन्छ । बाँकी मन्त्रीहरू पनि फेरिन सक्ने सम्भावना रहेको छ,’ बालुवाटार स्रोतले जानकारी दिएको छ । त्यस्तै केही मन्त्रीहरू पनि हेरफेर गरिन लागिएको छ । एमालेबाट सरकारमा जानेमा शेरबहादुर तामाङलगायत रहेका छन् । नेता तामाङलाई स्वास्थ्यमन्त्रीको जिम्मेवारी दिईदैंछ ।

जसपा नेता महतो उपप्रधानमन्त्री भएपछि मधेसमा पार्टी कमजोर नहोस् भन्नका लागि नेकपा एमालेका स्थायी कमिटी सदस्य महासेठलाई उपप्रधानमन्त्री बनाउन लागेको स्रोतको दावी छ । यसअघि ओली मन्त्रीपरिषद्मा महासेठकी पत्नी जुली महतो मन्त्री थिइन् ।