काठमाडौं । नेपाल प्रहरीको साइबर ब्यूरोले सामाजिक सञ्जाल फेसबुक, म्यासेन्जर, व्ह्वाट्सएप, भाइबर, इमो आदिमा अपरिचित व्यक्तिसँग भिडियो कल गर्दा सचेत रहन आग्रह गरेको छ । प्रहरीले विद्युतीय माध्यमबाट अपराध बढेको भन्दै सचेत रहन आग्रह गरेको हो ।

साइबर ब्यूरोका प्रहरी वरिष्ठ उपरीक्षक नविन्द अर्यालले आइतबार विज्ञप्ति जारी गर्दै केही आपराधिक समूहहरूले प्रविधिको दुरुपयोग गरी फसाउने र धम्की दिई बारम्बार रकम माग गर्ने लगायतका गलत कार्यहरुमा सक्रिय रहेकोले सजग रहन अनुरोध गरेका छन् ।

प्रहरीका अनुसार ती समूहले विभिन्न व्यक्तिहरूलाई सामाजिक सञ्जाल प्रयोगकर्तालाई फ्रेन्ड रिक्वेस्ट पठाउने मेसेन्जर, ह्वाट्सएप, भाइबर, इमो लगायतमा कल गर्ने र त्यसलाई रेकर्ड गरेर वार्गेनिङ गर्ने गरेका छन् ।

त्यसरी आएका कलहरुमा अनैतिक कुराकानी र अश्लिल क्रियाकलाप गरी उक्साएर उनीहरूलाई पनि संलग्न गराउने र भिडियो रेकर्डिङ गरेर ब्ल्याकमेलिङ गरी रकम माग्ने, नदिए सामाजिक तथा पारिवारिक सम्बन्ध तहसनहस गरिदिन्छु भनेर धम्क्याउने गरेको एसएसपी अर्यालले विज्ञप्तिमा उल्लेख गरेका छन् ।

’धम्की दिई बारम्बार रकम माग गर्ने गरेका घटनाहरू बढ्दै गएको हुँदा सम्पूर्ण सामाजिक सञ्जाल प्रयोगकर्ताहरुलाई यस्तो कृयाकलाप प्रति सजग रहन तथा आपराधिक ब्यक्ति तथा समूहको शिकारबाट जोगिन, प्रलोभनमा परी कोही कसैसँग पनि यस्तो प्रकारले भिडियोकल, भ्वाइसकल नगर्नु हुन सम्बन्धित सबैको जानकारी तथा जनचेतनाको लागि सूचित गरिन्छ,’ विज्ञप्तिमा भनिएको छ।