पोखरा । पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पताल पोखराका निर्देशक डा.भरत खत्रीले अक्सिजन नपाएर कोरोना संक्रमितहरुको मृत्यु भएको विषयमा वार्डहरुमा हुने अक्सिजन आपूर्ति नरोकिएको दावी गरेका छन् । यता, मृतकका आफन्तहरुले अक्सिजन अभाव हुँदा रातभरि अस्पतालमा भागादौड मच्चिए पछि विभिन्न सञ्चारमाध्यमहरुमा हारगुहार गरेका थिए ।

निर्देशक डा.खत्रीले शुक्रबार जारी गरेको विज्ञप्तिमा अक्सिजन प्लान्टमा विद्युत आपूर्तिमा समस्या भई केही समय अक्सिजन उत्पादन प्रभावित हुँदा पर्याप्त मात्रामा अक्सिजनको आपूर्ति हुन नसकेको उल्लेख छ ।

विज्ञप्तिमा डा.खत्रीले भनेका छन्–‘अक्सिजन प्लान्टमा विद्युत आपूर्तिमा समस्या भई केही समय अक्सिजनको उत्पादन प्रभावित हुँदा पर्याप्त अक्सिजनको आपूर्ति हुन नसकेको तर पनि वार्डहरुमा हुने आपूर्ति नरोकिएको व्यवहोरा समेत स्पष्ट पार्न चाहन्छौं ।’

जेठ १३ गते दिउँसोदेखि जेठ १४ गते विहानसम्म्को समयमा मृत्यु भएको र मृतकहरुमध्ये धेरै जनामा अन्य दीर्घकालिन स्वास्थ्य समस्या जस्तै मृगौंलाको समस्या भई नियमित डाईलाईसिस गरिरहेका, पक्षघात भई उपचाररत, कलेजो सम्बन्धि दीर्घकालिन समस्या रहेको, जटिलता सहितको मधुमेह भई उपचाररत रहेको तथा उनीहरुमा कडा किसिमको निमोनिया देखिएकोले विरामीहरुलाई उच्च मात्रामा अक्सिजन दिई उपचारको क्रममा नै मृत्यु भएको विज्ञप्तिमा उल्लेख छ ।