News Portal

ताजा शिर्षकहरु

चर्चित शिर्षकहरु

क्राईम–न्यूज प्रमुख समाचार

डा.गोविन्द केसीका सहयोगीलाई दुर्गा प्रसाईको धम्की

'तँलाई भेटे भने तेरो तीन इन्ची सर्ने गरी हान्दिन्छु, तँ कहाँ छस् ? त्यहीँ आउँछु म’: प्रसाईँ

काठमाडौँ । डा.गोविन्द केसीका सहयोगी प्रीतम सुवेदीलाई बीएन्डसी अस्पतालका सञ्चालक दुर्गा प्रसाईँले भौतिक आक्रमण गर्ने धम्की दिएका छन् । प्रसाईले टेलिफोनमा ‘तँलाई भेटे भने तेरो तीन इन्ची सर्ने गरी हान्दिन्छु,’ भनेका छन् । त्यस्तै प्रीतमका परिवारका अन्य सदस्यहरु (आमा, बुवा र बहिनी)लाई समेत जोडेर ‘डाँका’ भन्दै गालीगलौच गरेका छन् ।

डा.केसीको चिकित्सा क्षेत्र सुधार अभियानका मिडिया संयोजक सुवेदीलाई अस्पताल सञ्चालक प्रसाईँले फोन गरेर ‘तँ कहाँ छस् ? त्यहीँ आउँछु म’ भन्दै भौतिक आक्रमण गर्ने धम्की दिएका हुन् । सोलिडारिटी फर डा.केसी अलायन्सका संयोजक डा.जीवन क्षेत्रीका अनुसार प्रसाईँले प्रीतम र उनका अन्य परिवारका सदस्यलाई समेत गालीगलौच गरेका छन् ।

प्रधानमन्त्री खड्गप्रसाद ओलीको विश्वासपात्र मानिने प्रसाईँले झापास्थित बीएन्डसीलाई सम्बन्ध दिन लागेको विषयमा विरोध गर्दै गत हप्ता डा.केसीले प्रेस विज्ञप्ति जारी गरेका थिए । जुन विज्ञप्ति सुवेदीले विभिन्न सञ्चारमाध्यमहरुलाई उपलब्ध गराएका थिए । विज्ञप्ति जारी भएकै दिन नै प्रसाईँले सुवेदीलाई धम्की दिएका हुन् । ‘

डा.केसीले प्रसाईँले सञ्चालन गरेको बीएन्डसीसहित जुनसुकै मेडिकल कलेजलाई प्रधानमन्त्री ओली र शिक्षामन्त्री कृष्णगोपाल श्रेष्ठको ठाडो निर्देशनमा नियमविपरित सम्बन्धन दिने चलखेल भएको भन्दै विरोध जनाएका थिए । डा.केसीले बीएन्डसीसहित अनय जुनसुकै मेडिकल कलेजले पनि चिकित्सा शिक्षा ऐन र नियमावलीको प्रावधानअनुसार प्रक्रिया पुरा गरेर मात्र सम्बन्ध दिनुपर्ने बताएका थिए ।

सञ्चालक प्रसाईले ऐन जारी गर्नुअघि मनशाय पत्र पाएकोले आफूले स्वतः सम्बन्धन पाउने दावी गर्दै आएका छन् । यहीँ विषयमा विरोध जनाएका डा.केसीको विज्ञप्ति सञ्चारमाध्यममा पठायो भन्दै सुवेदीमाथि भौतिक आक्रमण गर्ने धम्की अस्पताल सञ्चालक प्रसाईँले दिएका हुन् ।

सोलिडारिटीले भौतिक आक्रमण गर्ने धम्की आईरहेकोले त्यसको जिम्मेवारी प्रसाईले लिनुपर्ने भन्दै सुवेदीको जीवन रक्षाको माग गरेको छ । अस्पताल सञ्चालक प्रसाईँका विरुद्धमा सोलिडारिटीले प्रहरीमा जाहेरीसमेत दर्ता गराउने तयारी गरिरहेको छ ।

प्रतिक्रिया