पोखरा । राष्ट्रपति र प्रधानमन्त्रीको कदम असंवैधानिक भएको भन्दै पोखरामा नेपाली कांग्रेसले विरोध प्रदर्शन गरेको छ । लकडाउनको समयमा पनि सडकमा उत्रिएका नेपाली कांग्रेस बैदामले विरोध प्रदर्शन गरेको हो ।

प्रधानमन्त्री खड्गप्रसाद ओलीको सिफारिसमा राष्ट्रपति विद्यादेवी भण्डारीले प्रतिनिधिसभा भङ्ग गर्दै चुनावको घोषणा गरेपछि यसको सर्वत्र विरोध भईरहेको छ । वर्तमान सरकारले चालेका प्रत्येक कदमहरु असंवैधानिक भएको भन्दै बाध्य भएर सडकमा आउनु परेको कार्यक्रम संयोजक नेपाली कांग्रेसका युवा नेता लक्ष्मण पहारीले बताए ।

विरोध प्रदर्शनमा नेपाली कांग्रेस वडा नं. ६ का सचिव शिशिर पहारी, तरुण दल कास्कीका जिल्ला सदस्य खिमलाल पहारी, तरुण दलका वडा सचिव प्रकाश न्यौपाने, नेपाल विद्यार्थी संघका नेताहरु सविना तिमिल्सिना, नवराज सुनार, सुमन नेपाली, अविनास नेपाली एवम् महिला संघका नेतृहरु मन्धरा ढकाल र प्रभा सुवेदी लगायतले राष्ट्रपति र प्रधानमन्त्रीको प्रतिनिधिसभा भङ्ग तथा निर्वाचनको घोषणा असंवैधानिक भएको बताएका थिए ।

आज साँझ हल्लनचोकस्थित स्वास्थ्य मापदण्डको पालना गर्दै सहभागी भएका युवाहरुले प्ले कार्ड प्रदर्शन गर्दै सरकारको प्रतिगामी कदमको विरोध गरेका थिए । युवाहरुले बोकेको प्ले कार्डमा ‘शितलनिवासी नतर्कीको मध्यरातमा नाङ्गो नाच, नाच बसन्ती नाच’, ‘जनता नरहे राजनीति कसलाई ? सरकार !’, ‘सरकारबाट घाट–घाटमा मतपेटीका राख्नु, मर्नेहरुको पनि इच्छा छ तँलाई भोट दिने !’, ‘म महामारीमा छु, मलाई अक्सिजन जरुरी छ, मतपत्र होइन’, लगायतका नाराहरु लेखिएको थियो ।