पोखरा । राष्ट्रिय जनमोर्चाले पार्टी निर्णय र निर्देशन विपरित काम गरेको भन्दै संसदीय दलको नेताबाट कृष्ण थापालाई हटाएको छ । नेपाली कांग्रेस, माओवादी केन्द्र र जनता समाजवादी पार्टीसँग सरकार बनाउने निर्णयमा समर्थन नगरेपछि जनमोर्चाको केन्द्रीय सचिवालयको बुधबार बसेको जुम बैठकले सांसद थापालाई तत्कालै संसदीय दलको नेताबाट हटाउने निर्णय गरेको हो ।

आज बुधबार जनमोर्चाका महासचिव मनोज भट्टले सांसद थापालाई संसदीय दलको नेताबाट हटाईएको जानकारी गण्डकी प्रदेशका सभामुख नेत्रनाथ अधिकारीलाई जानकारी गराएका छन् । सोही विषयमा जनमोर्चाका सचेतक पियारी थापाले सांसद कृष्ण थापालाई संसदीय दलको नेताबाट हटाईएको निर्णयको जानकारी संसद सचिवालयमा दर्ता गरिसकेकी छिन् ।

गत वैशाख १० गते थापासहित बसेको जनमोर्चा केन्द्रीय समितिको बैठक र १२ गते दलका नेताको हैसियतमा थापाकै अध्यक्षतामा बसेको बैठकले गरेको निर्णय पालना नगरेका कारण दलको नेताबाट हटाएको सचेतक थापाले पत्रमा उल्लेख गरेकी छिन् ।

थापासहित बसेको बैठकले गण्डकी प्रदेशमा नेपाली कांग्रेस, माओवादी केन्द्र र जनता समाजवादी पार्टीसँग मिलेर नयाँ सरकार बनाउने निर्णय गरेको थियो । पार्टी निर्णय र निर्देशन विपरित काम गरेको भन्दै थापालाई बुधबार आज नै जनमोर्चाले स्पष्टीकरण सोधेको थियो ।

यस विषयमा बागलुङको जैमिनीस्थित घरमा पुगेका सांसद थापाले आफूलाई केही थाहा नभएको सञ्चारमाध्यमहरुमा बताएका छन् ।
जनमोर्चाले थापालाई दलको नेताबाट हटाए पनि सांसद पदबाट नहाउँदा अझै पनि कांग्रेस नेतृत्वको विपक्षी गठबन्धनलाई तत्काल सरकार बनाउन बहुमत भने पुग्दैन । यदि जनमोर्चाले सांसद थापालाई सांसद पद नै नरहने गरी कारवाही गरेमा मात्रै विपक्षी गठबन्धनलाई सरकार गठन गर्न बल्ल बहुमत पुग्नेछ ।