पोखरा । राष्ट्रिय जनमोर्चाले गण्डकी प्रदेशमा विपक्षी गठबन्धनलाई मतदान गर्न संसदीय दलका सदस्यहरुलाई ह्रवीप जारी गरेको छ । आज जनमोर्चाकी सचेतक पियारी थापाले सांसदहरु कृष्ण थापा र खिमबिक्रम शाहीलाई पत्राचार गर्दै नेपाली काँग्रेस नेतृत्वको गठबन्धनलाई समर्थन गर्न ह्वीप जारी गरेकी हुन् ।

जनमोर्चाकी सचेतक थापाले जारी गरेको ह्वीपमा गण्डकी प्रदेशका मुख्यमन्त्रीमा नेपाली काँग्रेसका कृष्णचन्द्र नेपाली पोखरेललाई नियुक्त गर्नका लागि दावी पत्रमा अनिवार्य रुपमा हस्ताक्षर गर्न भनिएको छ ।

यतिबेला गण्डकी प्रदेशमा नयाँ सरकार गठन गर्नका लागि जनमोर्चाका तीन सांसद निर्णायक अवस्थामा रहेका छन् । विभिन्न सञ्चार माध्यमहरुमा सांसद कृष्ण थापा र खिमबिक्रम शाहीले काँग्रेसलाई मतदान गर्न नसकिने खालका अभिव्यक्तिहरु सार्वजनिक गर्न थालेपछि ह्वीप जारी गर्नुपर्ने अवस्था आएको हो ।

यस अघि गण्डकी प्रदेशका मुख्यमन्त्री पृथ्वीसुब्बा गुरुङका विरुद्धमा अविश्वासको प्रस्तावमाथि मतदान हुँदा जनमोर्चाका सांसद खिमबिक्रम शाही गायब बनाईएका थिए । सांसद शाहीका कारण उनको सुरक्षा र खोजी गरी पाउँ भन्दै सचेतक थापाले निवेदन दिदाँ संसद बैठक नै रोकिएको थियो ।

त्यसपछि, गण्डकी प्रदेशका मुख्यमन्त्री पृथ्वीसुब्बा गुरुङले प्रदेश प्रमुख सिता पौडेल समक्ष राजीनामा पत्र बुझाएपछि तीन दिन भित्रमा नयाँ सरकार गठनका लागि आह्वान गरिएको थियो । तर, केन्द्रले काँग्रेस–माओवादी गठबन्धनलाई सहयोग गर्ने निर्णय गर्दा समेत गण्डकीका सांसदद्वयहरुले भने काँग्रेसलाई मतदान गर्न नसकिने विचारहरु मिडियामा सार्वजनिक गर्दै आईरहेका थिए ।

सांसद शाहीले आफू विरामी परेर अस्पतालमा भर्ना हुँदा समेत गलत अर्थ लाग्ने गरी बदनाम गरिएको भन्दै आए पनि कोरोना संक्रमणको परीक्षण रिपोर्ट हेर्दा पूर्णरुपमा फर्जी नै देखिन्छ । सांसद शाही सोही दिन अपहरण शैलीमा गायब भए पनि उनलाई आर्थिक र अन्य कुनै पदको प्रलोभनमा परी योजनावद्ध ढंगले मुख्यमन्त्री गुरुङको सत्ता टिकाउन चलखेल गरेको आरोप लाग्ने गरेको छ । त्यसो त सांसद शाही र कृष्ण थापाको अभिव्यक्ति र व्यवहारले पनि यस्तै तर्कलाई पुष्टि गर्ने गरेको छ ।