News Portal

ताजा शिर्षकहरु

चर्चित शिर्षकहरु

प्रमुख समाचार स्वास्थ्य

शैक्षिक संस्थाहरु वैशाख मसान्तसम्म बन्द

एसइई र कक्षा १२ को परीक्षा भने सञ्चालन गर्ने निर्णय

काठमाडौं । कोभिड १९ को संक्रमणको अत्याधिक जोखिम बढेको भन्दै पुनः शैक्षिक संस्थाहरु वैशाख मसान्तसम्मका लागि बन्द भएका छन् । संक्रामक रोग ऐन २०२० को दफा २ अनुसार सरकारले जोखिमको संभावना उच्च रहेका क्षेत्र घोषणा गर्दै विद्यालय बन्द गर्ने घोषणा गरेको हो ।

शैक्षिक संस्थाहरूले वैकल्पिक विधिबाट पठनपाठन गरेर निर्धारित समयमै परीक्षा भने सञ्चालन गर्नेछन् । सोमबार बसेको मन्त्रिपरिषद् बैठकले सहरी क्षेत्र र भारतीय सीमा जोडिएका सहरका शैक्षिक संस्था, विद्यालय, कलेजलगायतमा हुने भौतिक उपस्थितिसहितको पठनपाठनमा रोक लगाउने निर्णय गरेको हो ।

मन्त्रिपरिषद् बैठकले उपत्यकाका तीन जिल्लाका सबै र अन्य जिल्लामा उच्च जोखिम रहेका पालिकाका शैक्षिक संस्था बन्द गर्ने निर्णय गरेको हो । संक्रमणका आधारमा स्वास्थ्य मन्त्रालयले १४ जिल्लालाई उच्च जोखिममा राखी विद्यालयलगायतका क्षेत्रमा भिडभाड नगर्न आग्रह गरेको हो ।

काठमाडौं, ललितपुर, कास्की, रूपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा र बाग्लुङलाई उच्च जोखिमको सूचीमा राखिएको छ । सरकारले विभिन्न जिल्लाका उच्च जोखिम भएका स्थानीय तह तोकेरै भौतिक कक्षा बन्द गरी भर्चुअल पठनपाठनलाई निरन्तरता दिने निर्णय गरेको हो ।

काठमाडौं, भक्तपुर, ललितपुरका सबै स्थानीय तहका शैक्षिक संस्थामा भौतिक कक्षा बन्द गर्ने निर्णय भएको छ । त्यस्तै, विराटनगर, वीरगन्ज, भरतपुर, पोखरा महानगरपालिकाका र इटहरी, धरान, जनकपुर, हेटौँडा, बुटवल, घोराही, तुल्सीपुर, नेपालगन्ज तथा धनगढी उपमहानगरपालिकाका शैक्षिक संस्था पनि बन्द हुनेछन् ।

त्यस्तै, मेचीनगर, बिर्तामोड, दमक, राजविराज, बनेपा, धुलिखेल, सिद्धार्थनगर र भीमदत्तनगर नगरपालिकामा रहेका विद्यालय, कलेज, ट्युसन सेन्टर, तालिम केन्द्रलगायतका शैक्षिक संस्थाहरूमा पनि वैकल्पिक विधिबाट सिकाइका गतिविधि गर्न सरकारले निर्देशन दिएको छ । सरकारले विद्यालय र कलेजका पूर्वनिर्धारित परीक्षा तथा चिकित्सा शिक्षाका सबै किसिमका प्रयोगात्मक कक्षा जनस्वास्थ्यका मापदण्ड पालना गरी सञ्चालन गर्ने निर्णय पनि गरेको हो ।

शैक्षिक संस्थाहरु बन्द भएपनि पूर्व निर्धारित परीक्षा भने नरोकिने भएका छन् । राष्ट्रिय परीक्षा बोर्डले १३ जेठबाट लिने एसइई र २६ जेठदेखि कक्षा १२ को परीक्षा सञ्चालन गर्ने निर्णय गरिसकेको छ । त्यसैगरी विश्वविद्यालयका परीक्षा सञ्चालन भइरहेका छन् ।

मन्त्रिपरिषद्का निर्णय
–सार्वजनिक स्थान र कार्यालयमा मास्क नलगाए १० रुपैयाँ जरिवाना
–एक ठाउँमा २५ जना बढी जम्मा हुन नपाइने
–होटेल तथा रेस्टुरेन्ट बिहान ८ देखि बेलुका ८ बजेसम्म मात्रै खोल्न पाइने
–सार्वजनिक यातायातले सिट क्षमताभन्दा धेरै यात्रु बोक्न नपाउने
–आन्तरिक हवाई उडानमा मास्क र भाइजर अनिवार्य
–सिनेमा हल, पार्टी प्यालेस, डान्स बार, दोहोरी, क्लब, हेल्थ क्लब–जिमखाना, स्विमिङ पुल, फुटसल, सभा, आमसभा, जुलुस, हाटबजार र दर्शकसहितको रंगशाला वैशाख मसान्तसम्मका लागि बन्द

प्रतिक्रिया