पोखरा । समाजसेवी तथा नेपाली कांग्रेसका पुराना नेता प्रेमनारायण बरालको ८८ वर्षको उमेरमा निधन भएको छ । प्रजातन्त्रका लागि पञ्चायत विरुद्ध सशक्त आन्दोलन गर्दै शैक्षिक तथा धार्मिक क्षेत्रमा विशेष योगदान पु¥याउँदै आउनु भएका बरालको निधनले अपुरणीय क्षति पुगेको कास्की कांग्रेसले जनाएको छ ।

नेपाली कांग्रेस कास्कीका सभापति कृष्ण केसी र पोखरा वडा नं. ७ का इकाई सभापति नबिनराज बरालले छुट्टाछुट्टै विज्ञप्ति जारी गर्दै लोकतन्त्रको विकास, विस्तारसँगै शैक्षिक र धार्मिक क्षेत्रमा बरालले पु¥याउनु भएको योगदान सदैव स्मरणीय रहने उल्लेख गर्नुभएको छ । विज्ञप्ति मार्फत् दिवंगत आत्माको चिरशान्तिको कामना गर्दै शोकसन्तप्त परिवारजनमा समवेदना व्यक्त गरिएको छ ।

उनको पार्थिव शरीरमा नेपाली काँग्रेसका वरिष्ठ नेता शुक्रराज शर्मा, कास्की काँग्रेस सभापति कृष्ण केसी, पूर्वमन्त्री यज्ञबहादुर थापा, कांग्रेस नेता सोभियतबहादुर अधिकारी, युवा नेता देवराज चालिसे, जिल्ला उपसभापति आइबहादुर गुरुङ, क्षेत्रीय सभापति माधवप्रसाद बास्तोला, पोषनाथ शर्मा र इकाई सभापति नबिनराज बराल लगायत नेताहरुले पार्टीको चार तारे झण्डा ओढाएर श्रद्धाञ्जली अर्पण गरेको कास्की कांग्रेसका प्रवक्ता नवीन सिग्देलले जानकारी दिए । सो अवसरमा नेता कार्यकर्ता , आफन्त , शुभेच्छुक र विभिन्न संघ सस्थाका ब्यक्तिहरुले श्रद्धाञ्जली ,ब्यक्त गरेका थिए ।

स्वर्गीय बरालका २ श्रीमती, ३ छोरा र ३ छोरी रहेका छन् । एक छोरा सरोज नारायण बराल कांग्रेस नगर सचिव हुनुहुन्छ ।