स्याङ्जा । घाइते सहचालकलाई नदीमा बगाएको आरोपमा प्रहरीले एकजनालाई पक्राउ गरेको छ । स्याङ्जामा ट्याक्टरबाट खसेर घाइते भएका आफ्नै साथीलाई नदीमा बगाएको आरोपमा प्रहरीले ट्रयाक्टरका सहचालक गल्याङ नगरपालिका वडा नं. ८ का २२ वर्षीय सुनिल रानालाई पक्राउ गरेको हो ।

गत चैत ५ गते गल्याङ नगरपालिका–९ पारीचौरमा ढुंगा बोकेर आएको लु अ फ १०२० (अस्थायी) नम्बरको ट्याक्टरका सहचालक गल्याङ नगरपालिका–८ का १९ वर्षका गणेश गाहा घाइते भएका थिए । घाइते गणेशलाई चालक अमित परियार र सहचालक सुनिल राना मिलेर कालीगण्डकी नदीमा फालिदिएको जिल्ला प्रहरी कार्यालय स्याङ्जाका डिएसपी राजेन्द्र अधिकारीले जानकारी दिए । ट्याक्टर चालक अमित परियार भने अझै पक्राउ परेका छैनन् ।

डीएसपी अधिकारीका अनुसार घटना भएपछि उनीहरुले ट्याक्टर त्यसै छाडेर भागेका थिए । सहचालक सुनिल भने घटना लगत्तै पाल्पास्थित दिदीको घरमा पुगेका थिए । दिदीको घरमा पुगेपछि घटनाका विषयमा जानकारी गराएपछि पाल्पा प्रहरी हुँदै स्याङ्जा प्रहरीले सो घटनाका विषयमा जानकारी पाएको हो ।

पक्राउ परेका सहचालक सुनिलले प्रहरीका सामु उक्त घटना स्वीकार गरिसकेको प्रहरीको भनाई छ । प्रहरीले स्याङ्जा जिल्ला अदालतबाट ७ दिनको म्याद थपी कर्तव्य ज्यान मुद्दामा अनुसन्धान अगाडि बढाएको छ । यता, नदीमा फालिएका गणेश गाहाका परिवार भने साथी कहाँ गएको होला भनेर खोजी कार्य नगरेको र अहिलेसम्म शव नभेटिएका कारण गोताखोर मगाएर खोजी थालिएको स्याङ्जाका डिएसपी अधिकारीले जानकारी दिए ।