News Portal

ताजा शिर्षकहरु

चर्चित शिर्षकहरु

प्रमुख समाचार राजनीति

१० गतेको बन्द सफल बनाउन आह्वान

'नेता तथा कार्यकर्तामाथिको धरपकड तथा गिरफ्तारीको विरोध गर्दै नेकपाद्वारा बन्दको आयोजना'

पोखरा । नेत्रविक्रम चन्द ‘विप्लव’ नेतृत्वको प्रतिबन्धित नेपाल कम्युनिष्ट पार्टीले माघ १० गते आह्वान गरेको नेपाल बन्द सफल बनाउन अनुरोध गरेको छ । गत पुस २९ गते नेकपाका केन्द्रीय सचिवालय सदस्य धमेन्द्र बास्तोला ‘कञ्चन’ लगायतका नेता तथा कार्यकर्तामाथिको धरपकड तथा गिरफ्तारीको विरोध गर्दै नेकपाले बन्दको आयोजना गरेको हो ।

नेकपा माथिको प्रतिवन्ध र दमन बन्द गर्न, नेता तथा कार्यकर्तामाथिको धरपकड रोक्न र गिरफतार नेता तथा कार्यकर्ताहरुको विना शर्त मुक्त गर्न र एकीकृत जनक्रान्तिलाई राजनैतिक विषयका रुपमा आत्मसाथ गर्न आह्वान गर्दै बन्दको आयोजना गरिएका विज्ञप्तिमा उल्लेख छ ।

नेकपा कास्कीका इन्चार्ज पूर्णजीत पुन र सेक्रेटरी विश्वासले संयुक्त विज्ञप्ति जारी गर्दै सम्पूर्ण उद्योगधन्दा, कलकारखाना, यातायात, संघसंस्था, कार्यालयहरु, बजार र पसलहरु बन्द गरी स्वेच्छाचारी र फासिवादी हर्कत विरुद्धको संघर्षलाई सहयोग गर्न अनुरोध गर्नुभएको हो ।

केपी सरकार झन् झन् निरंकुश, तानाशाही र फासिष्ट बन्दै गएको भन्दै विज्ञप्तिमा असफल र पतित संसदवादी समूहहरुले देशलाई चरम अराजकता, अस्थिरता र पराधिनतातिर जबर्जस्त धकेलिरहेको उल्लेख छ ।

‘व्यक्तिका चरम सत्तास्वार्थका पराकाष्ठाले जनताका अभिमतलाई बलात्कार गर्दै मुलुकलाई विदेशी शक्तिकेन्द्रका क्रिडास्थल बनाउन होडवाजीमा दौडिरहेको र संसदवादी खलनायकहरुका नौटंकी हेरेर जनता आजित बनेको छ ।’, विज्ञप्तिमा भनिएको छ,‘जनताको अधिकार हनन, भ्रष्टाचार, दलाली, कमिशनखोर, तस्करी तथा राष्ट्रघातका विरुद्ध राजनैतिक संघर्ष गरिरहेको हाम्रो पार्टीलाई प्रतिबन्ध लगाएर दलाल केपी सरकारले राजनैतिक व्यवस्थाको न्यूनतम मान्यतालाई समेत धज्जी उडाएको छ ।’

‘गत पुस २९ गते नेकपाका केन्द्रीय सचिवालय सदस्य धमेन्द्र वास्तालो ‘कञ्चन’, हेमन्त प्रकाश ओली लगायत दर्जनौं केन्द्रीय नेताहरु तथा व्यूरो र जिल्लास्तरका सयौं नेता कार्यकर्ताहरु जेल मैं हुनुहुन्छ ।,’ विज्ञप्तिमा भनिएको छ,‘केपी सरकार र राज्यलाई हाम्रो पार्टीमाथिको प्रतिवन्ध र दमन वन्द गर्न, नेता कार्यकर्तामाथिको धरपकड रोक्न, गिरफ्तार कमरेडहरुलाई विना शर्त मुक्त गर्न र एकीकृत जनक्रान्तिलाई राजनैतिक विषयका रुपमा आत्मसाथ गर्न आग्रह गर्दछौं ।’

प्रतिक्रिया