News Portal

ताजा शिर्षकहरु

चर्चित शिर्षकहरु

डन न्यूज खोज प्रमुख समाचार

राष्ट्रिय परीक्षा बोर्ड केन्द्रले थाल्यो छानबिन

'मंसिर ११ गते घटेको सो घटनाका विषयमा विद्यालय व्यवस्थापन समितिले पुस ६ गतेबाट छानबिन शुरु गरेको थियो'

  • गत मंसिर ११ गते पोखरा–३२ खोलाको छेउमा एकजना छात्रालाई होटलको कोठामा राखी परीक्षा लिईएको
  • पुस ६ गतेबाट सो घटनाका विषयमा विद्यालय व्यवस्थापन समितिले छानबिन शुरु गरेको
  • पुस १९ गते प्रधानाध्यापक एवम् परीक्षाका केन्द्राध्यक्ष तिवारीले एकजना छात्राको मात्र परीक्षा रद्द गर्न उजुरी दिनुभएको
  • पुस २० गते व्यवस्थापन समितिले छानबिनको प्रतिवेदन, प्राप्त ठोस प्रमाणहरुसहित कारवाहीको लागि उजुरी दर्ता गराएको

पोखरा । राष्ट्रिय माध्यमिक विद्यालय पोखरा–१ टुँडिखेलमा परीक्षाका नाममा भएका अनियमितता र परेका उजुरीहरुका विषयमा राष्ट्रिय परीक्षा बोर्ड सानोठिमी, भक्तपुरले छानबिन शुरु गर्ने भएको छ । राष्ट्रिय परीक्षा बोर्डका अध्यक्ष प्रा.डा.चन्द्रमणि पौडेलले आज डन न्यूजसँग कुराकानी गर्दै छानबिन प्रक्रिया छिट्टै अघि बढ्ने बताउनुभयो ।

राष्ट्रिय परीक्षा बोर्डका अध्यक्ष प्रा.डा.पौडेलले भन्नुभयो–‘राष्ट्रिय मावि पोखराका विषयमा परेका सम्पूर्ण उजुरी र निवेदनहरुको डकुमेन्ट हामीलाई प्राप्त भईसकेको छ । हामी छिट्टै नै त्यो बोर्ड बैठकमा पेश गर्छौं र छानबिन अघि बढ्छ ।’

यता, मंसिर ११ गते घटेको सो घटनाका विषयमा विद्यालय व्यवस्थापन समितिले पुसको ६ गतेबाट छानबिन शुरु गरेको थियो । सो क्रममा विद्यालयका प्रधानाध्यापक सुर्य तिवारी, सहकेन्द्राध्यक्ष घनश्याम रेग्मी र छात्रालाई परीक्षा दिलाउन होटलमा पु¥याउने शिक्षक शिरिषकुमार वस्ताकोटी सबैसँग सोधपुछ र वयान लिने काम गरेको थियो । छानबिन समितिमा शिक्षक वस्ताकोटीले सहकेन्द्राध्यक्ष घनश्याम रेग्मीसँग सहकार्य गरेरै विद्यार्थीलाई होटलमा पु¥याएको बयान दिएका थिए । छानबिनका क्रममा शिक्षक वस्ताकोटीले आफूले मदिरा सेवन गरेर बसेको पनि स्वीकार गरेका थिए ।

विद्यालय व्यवस्थापन समितिका अध्यक्ष मोहन दवाडी ‘हिमाल’को संयोजकत्वमा पाँच सदस्यीय छानबिन समिति बनाई घटनाको सत्यतथ्य छानबिन गरेको थियो । समितिले घटनाको सत्यतथ्य छानबिन गरेर प्रतिवेदन तयारी पारी कारवाहीका लागि राष्ट्रिय परीक्षा बोर्ड पोखरामा निवेदन दर्ता गर्न जानु भन्दा १ दिन अगाडि नै प्रधानाध्यापक सुर्य तिवारीले परीक्षा रद्द गरी पाउँ भनी निवेदन दिनुभएको थियो ।

जब कि परीक्षाका नाममा गलत कार्यहरु भएको विषयमा केही पनि नबोलेका प्रधानाध्यापक तिवारी एक्कासी व्यवस्थापन समितिले छानबिन गर्दै गर्दा आफू फस्ने डरले अघिल्लो दिनमा नै पुगी एकजना छात्राको मात्र परीक्षा रद्द गराई पाउँ भनी दिईएको निवेदनले पनि धेरै आशंकाहरु जन्माएको छ ।

पुस १९ गते राष्ट्रिय परीक्षा बोर्डमा राष्ट्रिय माविका प्रधानाध्यापक एवम् परीक्षाका केन्द्राध्यक्ष तिवारीले निवेदन दर्ता गर्नुभएको र २० गते व्यवस्थापन समितिले छानबिनको प्रतिवेदन, प्राप्त ठोस प्रमाणहरुसहित कारवाहीको लागि उजुरी दर्ता गराएको राष्ट्रिय परीक्ष बोर्डका प्रमुख विष्णुकुमार श्रेष्ठले जानकारी दिनुभयो । कार्यालय प्रमुख श्रेष्ठले भन्नुभयो–‘यी दुवै उजुरीहरु आवश्यक कारवाही र छानबिनका लागि भनेर राष्ट्रिय परीक्षा बोर्ड सानोठिमी, भक्तपुर पठाई सकिएको छ ।’

गत मंसिर ११ गते पोखरा–३२ खोलाको छेउमा एकजना छात्रालाई होटलको कोठामा राखी परीक्षा लिईएको विषयबाट शुरु भएको छानबिनका क्रममा परीक्षाका नाममा धेरै अमर्यादित क्रियाकलाप र गल्तीहरु भएको भेटिएको थियो ।

प्रतिक्रिया